[MONACHI SAZAVIENSIS
CONTINUATIO COSMAE]
De chronica sancti Iheronimi
et compositione annorum
Beatus Hieronimus in chronica, quam propriis manibus contexuit, ita
commemorat: Ab Adam usque ad diluvium anni 2242. A diluvio usque ad Abraham
anni 942. Ab Abraham usque ad nativitatem Domini anni 2015. In quorum summa
inveniuntur quinque milia et insuper centum nonaginta novem. Anni ab
incarnatione Domini:
932. Eodem anno Hinricus rex Abottritos subegit.
958. Signum crucis in vestimentis hominum apparuit, illis autem, qui derisui
illud habebant, mortem inferens, illis autem, qui pie et religiose illud
venerabantur, nil mali intulit.
960. Isto anno venerunt legati Rusciae gentis, ad regem Ottonem, et
deprecati sunt eum, ut aliquem suorum episcoporum transmitteret, qui eis
ostenderet viam veritatis, et professi sunt, se velle recedere a paganico ritu
et accipere nomen et religionem christianitatis. Et ille consensit petitioni
eorum, et transmisit Adalbertum episcopum in fide catholicum. Illi per omnia
mentiti sunt, sicut postea eventus rei probavit, quia ille praedictus episcopus
non evasit letale periculum ab insidiis illorum.
962. Tuto, episcopus Ratisponensis ecclesiae, obiit.
963. Magnum synodale concilium factum est Romae in ecclesia sancti Petri
apostoli, ibique praesidebat Otto imperator augustus cum magna multitudine
episcoporum, abbatum, monachorum, praepositorum, clericorum, illicque deiectus
est Benedictus papa ab apostolica sede, et Adaldago episcopo commissus, in
Saxoniamque est deductus, illicque vitam finivit. Et ipso in anno mortalitas
invasit exercitum Ottonis imperatoris.
972. Sanctus, Oudalricus episcopus Augustensis ecclesiae, migravit ab hoc
seculo IV Non. Julii, cuius corpus sepelivit sanctus Wolfgangus, episcopus
Ratisponensis.
973. Otto imperator primus Theutonicorum pius, heu proh dolor! Non. Maii
obiit, cui Otto, filius eius, successit.
975. Hyems durissima et importune longa. Et Idus Mai nix magna noviter lapsa
terram operiebat. Eodem anno Rudbertus archiepiscopus obiit, cui Willigisus
successit.
985. Saxones Sclavoniam invaserunt, quibus ad supplementum Misacho dux cum
magno exercitu venit, qui totam terram Sclavonicam incendiis et caedibus
devastarunt.
986. Otto rex adhuc puerulus cum magno exercitu Saxonum venit in Sclaviam,
et multis incendiis et caedibus devastarunt.
987. Eodem anno Saxones iterum Sclaviam invaserunt, et ad ultimum ipsi
Sclavi regis ditioni subduntur, et castella iuxta Albim flumen denuo restaurata
sunt. Et ventus ingens aedificia multa stravit.
988. Isto anno estatis fervor immanis pene cunctos fructus consumpsit, et
mox grandis mortalitas hominum subsecuta est.
989. Eodem anno cometae apparuerunt, quos pestilentia subsecuta grandis
hominum et iumentorum, maxime boum.
990. Eclipsis solis facta est XII Kal. Novembris, quinta hora diei. Eodem
anno sanctus Adalbertus, episcopus Pragensis ecclesiae sanctae, Romae ad
sanctum Alexium confessorem et ad sanctum Bonifacium inscio abbate, quis esset,
factus est monachus. Item eodem anno Nemci perdita est.
Anno dominicae incarnationis 996 sanctus Adalbertus, episcopus Boemorum
secundus de Praga civitate, a Pruzis glorioso martyrio IX Kal. Maii coronatur,
cui Theadagus successit.
998. Eodem anno, mense Julio terrae motus factus est horribilis per totam
Saxoniam, duoque lapides igniti ex tonitru ceciderunt, unus in ipsa civitate
Magdeburgensi, alter ultra Albim fluvium.
999. Eodem anno obiit Bruno papa, qui Romano more Gregorius vocabatur.
1000. Caesar vero Otto, antequam patriam visitaret, humili devotione in
Polonis sanctum Adalbertum episcopum et martyrem nuper Christo laureatum adiit,
eius interventum obnixius petiit, ibique summo conanime a duce Sclavonico
Bolezlavone susceptus, xeniis omnigeni census obsequialiter honoratur. Dehinc
in patriam imperator Otto revertitur, ac Quidlinburgensi loco dominicam
resurectionis diem debitae venerationis obsequiis festive peregit.
1001. Dux Mesco Poloniesis obtinuit civitatem Pragam.
De exordio Zazavensis
monasterii
Hoc in loco congruum videtur non debere praetermitti, qualiter coenobium
Zazavense divinae dispositionis gratia exordium sumpserit, sed quibus
principibus et qualiter ex tenui origine auctore deo in tantam, ut hodie
cernitur, amplitudinem excreverit, ut et in hoc, sicut in ceteris pietatis suae
operibus, divinae bonitatis magnificentia ab omnibus fidelibus laudetur.
Tempore siquidem praefati ducis Oudalrici, in divino cultu viri magnifici, fuit
heremita Procopius nomine, natione Boemicus de villa Chotun, sclavonicis litteris
a sanctissimo Quirillo episcopo quondam inventis et statutis canonice admodum
imbutus; in seculo presbyter eximius, honesta vitae et casta mysteria
celebrans, postmodum infula monasticae parmatus professionis, solus cum solo
deo in fidei pignore inconvulsus deguit. Hic quippe pro amore Jesu Christi toto
spiritus sui ardore fervens, vanitatem nequam huius mundi contempsit, et domum
uxoremque, agros, cognatos atque amicos, immo semetipsum sibi abnegans,
versuciali seculo et pompis suis miserabilibus valedixit, a cuius tumultuoso
turbine fugiens, secreta solitudinis petiit, atque supercilio cuiusdam desertae
speluncae, quam mille daemonia, ut fertur, inhabitabant, coelestibus armis
loricatus, consedit, ibique quibus se posset tueri obstaculis virtutum constructis
contra canes viciorum et impetum spiritualium nequitiarum ac suggestionum
sagittas, ad petram, quae Christus est, orationibus, vigiliis, ieiuniis
allidens, viriliter pugnare coepit. Dum igitur in dilecta sibi solitudine a
naufragio secularis tumultus liber ac ab omnibus occultus, per multum tempus
deo indefessus agonizaret, pia divinitatis dispositio civitatem in monte
positam latere et lucernam sub medio abscondi minime voluit, sed ad laudem et
gloriam nominis sui in propatulo exemplo multorum fidelium lucere. Coelesti
namque gratia dictante, dum idem dux consueto more illum locum, quem ad
venandum speciatim elegerat, quodam tempore venandi gratia adisset, interim dum
venationi daret operam unum ex multitudine cervum ad secretiora nemoris
profugientem insecutus usque in verticem praedictae speluncae, reperit exili
tugurio Procopium virum monachili sub habitu heremiticam excolere vitam. Primo
igitur rei novitatem principalis celsitudinis modificato tenore, mentis
alacritate, dulci verborum affabilitate singula ex ordine percunctatur, quis et
quibus ab oris venerit, vel qua de causa vir talis tamque rarus eas solitudines
incolere voluerit. Cuius ad interrogata Procopius breviter ac humiliter
respondens, omnem, sicut res erat, veritatem seriatim exposuit, et ad ultimum
subiunxit, se pro amore dei et spe supernae retributionis mundo funditus
renunciasse, et in eodem deserto, si deo placeret, finetenus velle persistere.
Princeps igitur prudens in domino ammirans viri tam arduum propositum, et
adtendens vultum sanctae religionis gratia praeditum, utrasque manus coelis
tetendit, deum lacrimis perfusus benedixit, deinde orationibus eius sese
attentius commendat, et in spiritualem patrem sibi adoptat, et larga manu
subsidium exhibens, ad militum stationem regreditur gaudens. Exinde igitur
coelesti dictante gratia crescebat adeo longe lateque per cuncta compita fama
virtutum illius, multiplici sermone discurrens, ut ad eius opinionem catervatim
provinciae eiusdem homines xenia offerrent ipsiusque orationibus sese devote
manciparent. Qui caritatis flagrantia plenus, hospitalitate pie praeditus,
prudentia sancta decenter ornatus, castimonia purus, humilitatis misericordia
providus, temperantia clarus, habundantia zeli fidei plenus, qui sermone
praedicationis sanctae pectora audientium, ut imber temporaneus oportuno
tempore infusus irrigabat, ac doctrinae suae vomere mentes utillime reformabat.
Pauperes denique tanta pietatis largitione sibi divinitus ingenita suscipiebat,
tamque prona et laeta famulatus sollicitudine ministrabat, ac si manifestissime
Christus adesset, ut omnis territorii eius industria mendici atque pifaudi
pascerentur. Properabat equidem ad eum multitudo fidelium, habentes in
desiderio animi sui seculi lucris renunciare, secum finetenus commanere, quos benigne
amplectans fovebat, sicut gallina pullos suos sub alis. Brevi itaque temporis
dilapso interstitio, felix pater Procopius, coadunatis quibus potuit sumptibus,
iecit fundamentum in nomine domini, et basilicam in honore sanctissimae dei
genitricis Mariae et sancti Joanis Baptistae construxit, et aggregavit quosdam
fratres vita et moribus religiosos, quibus spiritualiter concordantibus unanimi
caritate monastica fieri moderamina et mysteria divina iuxta exemplar almifici
patris Benedicti constituit, ipse vero minimus in minimis effectus. Cuius
quantum prudens et efficax diligentia mentis industriaque ac sollicitudo, et
quam pia caritatis affluentia erga fratres extiterit, nullius facundia digne
sufficit enarrare. Dux igitur praedictus et primatus curialis patrem vocitare
usui suo commendaverunt, quem etiam paterna veneratione diligere decenter
affectabat. Unde idem dux magnanimiter cum satraparum suorum ingeniositate
perspicaci prudentique consilio discretionis inito, eum ad abbatiae
investituram debere promoveri decrevit, quaedam coenobiali usui necessaria
decenter coaptans, quaedam pollicens, quae tandem decenter complevit. Ille vero
sese ceteris praeferre pertimescens, summo mansuetudinis humilitatisque
emolumento omnino recusabat, semet asserens imperitum hominem, et indignum
operam obedientiae minime subiectis impendere valere, deum, qui omnium
occultorum solus cognitor est, intimae suae inspectionis testem praeponens.
Interim piae memoriae duce Oudalrico ex hac luce subtracto, Bracizlaus,
filius eius, regni principatum obtinuit, vir per omnia divinae religionis
cultum diligens, opus, quod pater suus imperfectum reliquerat, omni sagacitatis
diligentia ad perfectum consummare decrevit. Audiens namque beati viri sanctam
opinionem, immenso tripudio, ultra quam credi posset, cum optimatibus suis
gavisus est, cuius sese gratulabundus commendans orationibus, seorsim
assumpsit, et de suscipienda abbatiae infula commonuit; deinde iterata vice in
praesentia omnis curialis dignitatis verbis persuasoriis aggreditur, et licet
velit nolit, pastoralis curae moderamina suscipere deberet. Sed vir dei in sibi
solita perdurans pertinacia omnino sese asserens indignum, nullatenus ad
consensum ducis flecti potuit. Sed divinae ordinationi quis est, qui
contradicat? Victus namque omni instantia precum omnique dilectionis
ammonitione atque affabilitate optimatum, violenter abbas ordinatur. Facta ergo
celebri promotione Bracizlaus primo quidem donationem, quam pater suus eidem
patri adhuc ante susceptionem abbatiae fecerat, flumen videlicet subterfluens a
Milobuz usque ad speluncam, quae vulgo Zacolnica dicitur, cum pratis et silva
circumiacente, principali corroboravit auctoritate; dein etiam hanc eandem
donationem supervenientibus heredibus et eam suo iuri usurpative vendicare molientibus,
nolens paterna cessare statuta, semet opposuit, litem diremit, et eidem patri
Procopio omnem utilitatem in aqua et silva a praedictis terminis redonavit,
agros vero et prata ex utraque parte adiacentia sub testimonio et confirmatione
filii sui Wratizlai et principum suorum DC denariorum pretio redemit, et abbati
Procopio scriptis et legitimis testibus reconsignavit. Ad extremum quoque ex
propria largitione terram, quae circa est, usque ad silvam Strnounic, nec non
villam Zcramnik et unum stagnum et structuram lignorum ad piscandum centum
denariis comparatam eidem abbati et suis successoribus pro remedio animae suae
in perpetuum possidenda contradidit.
Tam igitur felici processu iam factus abbas, non se super se extulit, sed
firmiori virtutum soliditate fundatus, humilitatis quoque ac caritatis
constanti excellentia stabilitus, tam hilaris et affectione benevolentiae
continens extitit, ut a subiectis sibi plus amori haberetur quam timori, quibus
tam publice quam singillatim salutaria ministrare monita multaque exemplis
priscorum dogmata pigmentata non desistebat. In tempore siquidem suo omnium
rerum opulentia non defuit, qui tamen exercitio laboris manuum suarum
sustentabatur, et pauperum inopiam refocillabat, atque in tristitia positorum
curam supportans cunctorum, eos uti prudens medicus infirmos antidoto paterno
et solatio recreabat. Qui dum tam beatam vitam et illustrem duxit, virtutum
signis in templo dei ceu sol usque ad consummationem vitae refulsit, quin immo
sancti Pneumatis instinctu prophetiae mysterio claruit praesagus futurorum.
Ante biduum siquidem suae terminationem resolutionis revelante divinitatis
gratia praescivit, qui accersito bonae qualitatis nepote Vito et filio suo piae
indolis Emmerammo, seriatim exposuit eis futura, sicuti et postea rei
comprobavit successus, singultuose tali verbi nobilitate inquiens: Karissimi
mei filioli, quos utpote gallina pullos educavi, perpendite, quia tempus meae
resolutionis adest; tertia certissime die domino annuente de huius carnis
tabernaculo migrabo, vos commendans deo, sed vestrae circumspectioni innotesco,
quod post discessum meum fluctivagorum detractionum varietate impetuosa
quassabimini, ac pestifero persecutionum tribulabimini naufragio, atque
extorres efficiemini sex annis in terra aliena, et iste locus potestativa manu
ducis tradetur possibilitati alienigenarum. Vos autem, dilectissimi filioli,
idcirco nolite a fide naufragare, fratres vestros confirmate, deum
expedibiliter laudate, in prosperis benedicite, in adversis supplicate, in laetis
gratias agite, in tristibus quaerite eventibus, cuius pietatis magnificentia
tandem consolabimini. Nam revolutis sex annis exilii vestri misertus,
tranquillitatis reparabit vobis statum, ac detractoribus vestris talionem
merito reddet, vosque ad potum consolationis reducet. Defuncto namque praesente
principe pio Bracizlao succedet Zpitigneus, qui vos persequetur; quo mortuo
Wratizlaus regimen principatus Bohemiae suscipiet, vir timoratus, benivolus.
Hic reducet vos de exilio, et dabit vobis Jesus Christus dominus noster in loco
isto pacem et securitatem omnibus diebus vitae vestrae. Amen. Jam vero
decedente die sequente, dum finita canonice vespertinali synaxi et completorio
resideret in lectulo, infirmitate vehementi correptus est, qui in articulo
mortis positus, quanquam ultimum anhelitum traheret, tamen antiquum hostem
orationis mucrone viriliter brachio extenso iaculari non cessabat. Adesse
extimplo fratres iubet, quos in moeroris afflictionem fletumque inconsolabilem
conversos paternae informatione consolationis corroborat, commonensque eos, de
corpore suo, de mundi huius naufragio migravit ad domininum, de servitio ad
regnum, de labore ad requiem, de morte ad vitam sempiternam, praestante domino
nostro Jesu Christo, qui in Trinitate perfecta vivit et gloriatur deus unus per
infinita secula seculorum. Amen. Consummavi tautem beatus abbas Procopius
cursum vitae suae feliciter in domino anno ab incarnatione domini 1053, et
eiusdem anni VIII Kal. Aprilis; praesente Severo, Pragensi episcopo, in
ecclesia sanctae dei genitricis Mariae, quam ipse construxit, honorifice est
sepulturae commendatus.
Post discessum igitur beatissimi patris Procopii consors societas propria
voluntate de congregatione Vitum, nepotem eius, elegit, qui electus sine dolo,
sine venalitate ordinatus est, vir in humanis et divinis rebus idoneus, seculi
huius inimicus, inclite morigeratus, sapientia pervigil, reverendus in vultu,
affabilis alloquio, lenitate placabilis. Quo in abbatia expedibiliter degente,
Bracizlaus dux ultimum mundo valedixit, cuius loco Zpitigneus monarchiae
gubernacula suscepit. Quo tempore sancti patris Procopii vaticinii ordo
completur. Instigante namque zelo diaboli, multi aemuli fictitia venenosa
detractionum conspirantes, laqueos cavillationum in curia ducis contra Vitum
abbatem et fratres eius astruere ceperunt, atque aures principis favorabiliter
compositis mendaciis obfuscantes, eos multipfariis vituperiis publicabant,
scilicet dicentes, per sclavonicas litteras heresis secta ypochrisisque esse
aperte irretitos ac omnino perversos; quam ob rem eiectis eis, in loco eorum
latinae auctoritatis abbatem et fratres constituere omnino esse honestum
constanter affirmabant. O invidia, inextricabilis maliciae zelus! O invidia
detestanda, omnimoda malitia conglobata, ignis inextinguibilis! Sed revera
sicut tinea vestimentum consumitur, sic is, qui illam zelatur, cui autem
invidet, clariorem reddet. Vitus itaque abbas assumptis fratribus suis, quos
unitas caritatis concordaverat, peregre profectus est in terram Hunorum. Nunc opere
pretium duximus unum ex multis beati viri miraculis compendio stili ac veridica
relatione fidelium memoriae caritativae tradere, quod domini nostri
magnaificentia per merita eius post mortem declarare dignata est. Memoratus
namque dux, Vito abbate cum nepote suo Emmerammo et fratribus, quos unitas
caritatis concordaverat, in terram Hunorum peregre proficiscentibus, propria
fautorum suorum consiliaria diffinitione utens, in loco illo abbatem genere
Teutonicum constituit, hominem turbida indignatione plenum. Ubi dum nocte prima
adventus sui ex more ad matutinalem synaxim pergens foribus ecclesiae
appropinquaret, apparuit vir sanctus Procopius infra ianuam oratorii appodians
et dicens ei: Unde tibi potestas hic degendi? Quid quaeris? At ille:
Potestativa, inquit, ducis maiestas et eius primatum inconvulsa sublimitas meae
possibilitatis regimini hoc coenobium usque ad finem vitae meae tradidit. Cui
sanctus pater: Citissime, inquit, sine confusionis verecundia discede, quod si
non feceris, ultio divinitus veniet super te. Et haec dicens evanuit. At ille
aestimans esse delusionem sathanae, omnino nichili pendebat. Qui dum sequenti
et tertia nocte minacem parvi penderet, quarta nocte apparuit ei ad matutinum
obsequium eunti sanctus vir dicens: Cur meis monitis amicabilibus obtemperare
recusasti? Filiis meis spiritalibus a domino impetravi hunc locum, non tibi,
qui supplantatim intrasti. Et si a domino tuo tibi duce haec hactenus potestas
fuit inhibita, a me sit amodo prohibita. Et haec dicens, impetuose fortissimis
ictibus cambuta, quam manu gestabat, illum ferire coepit, qui mox quasi Bellone
percussus oestro sine dilatione locum mutavit, et volatili cursu ad ducem
terrae pervenit, ac omnem rei eventum illi patefecit. At ille attonitus
vehementi ammiratione vacillare coepit, et ambiguitatis laqueo irretitus usque
ad finem vitae suae permansit.
Defuncto igitur Zpitigneo duce, divinitas fideli suo servo Wratizlao
memorali titulo ducatus gubernationem tradidit, qui cum divinum ecclesiae
diligeret unice cultum, etiam illum toto cordis affectu locum dilexit. Qui
missis legatis Hunorum ad regem, de exilio Vitum abbatem et fratres eius cum
honore reduxit et in loco suo decenter restituit. Quibus per merita et
orationes beati patroni Procopii omnipotentis dei propitia consolatio affuit,
quae ipsum locum omnium rerum profectibus abundantem redundantemque in
pristinum immo in ampliorem honorem enceniavit. Felix igitur abba Vitus, vir
ingentis industriae consiliique consensu fratrum, appropinquante vitae suae
termino, arcisterii sui commisit ius regiminis abbatialis Emmerammo
consanguineo suo, viro sanctitate conspicuo, in placito ducis satrapumque eius.
Ipse denique postea brevi transacto dierum spatio, diem clausit extremum, cum
domino victurus in aeternum. Cuius corpus iuxta fores in sinistra parte, in
ingressu ecclesiae sanctae dei genitricis Mariae humatum est.
Post discessum igitur eius Emmerammus abba benignus, homo simplicitatis
columbinae, sanctae vitae meritis et virtutum gemmis effulsit; qui nequaquam
serpentinae prudentiae animum admittens, fidei catholicae inconcussam, dum
vixit, constantiam tenuit, ac multorum dubia corda in fide Christi stabiliter
solidavit, vir per omnia perspicuae felicitatis in omnes et liberalitatis. Hic
denique non aliter nisi malum nominabat pecuniam, quam ex toto nichili pendens
nec manu tangere volebat, immo gressibus calcandam adiudicabat, sanctorum
apostolorum vestigia secutus, qui pretia eorum, quae vendebantur, sacris
tangere dextris vitabant, sed pedibus gazam ut lutum calcandam fore nobis
exempla reliquerunt. Igitur beatus abba cum iam monachilis militiae ordine apud
homines pater egregiae perfectionis, sanctae conversationis praedicaretur, et
affectione iusti amoris peroptime polleret, quia secundum veritatem nec civitas
in monte posita, nec lucerna sub modio latere potest, misit divinitatis
dispensatio infirmitatum castigationes in omnia membra eius, ne laudantium
extollentiam ei ingereret adulatio, ne mens eius elationes per humanas
laudationes incurreret, donec post periculum navigationis hoc mari magno et
spatioso securus ad felicitatis portum perveniret. Is ergo longo tempore, sicut
dominus noster voluit, multis calamitatum passionibus usquequaque afflictus,
rebus humanis exemptus est, multis suis successoribus, quia discessit, flendus,
sed quia ad regna coelestia pervenit, omni gaudio prosequendus. Hunc equidem
fratrum unanimitas dextra parte ingressus ianuae supradictae ecclesiae
sepelivit.
Hoc ita tempore rex Wratizlaus, piae memoriae commendandus, qui iam dicti
claustri ecclesiam libenter ditabat, Boemiensis monarchiae arcem regebat. Huius
pia voluntate cum fratrum electione in loco patris Emmerammi Bozethecus
abbatiae nactus est dignitatem, homo nimium circa omnes communis, liberalis in
cunctos. Hic pingere venustissime meminit, fingere vel sculpere ligno lapideque
ac osse tornare peroptime novit. Vir ingentis facundiae et promptae memoriae,
sed gloriae popularis avidus, praesumptuosus, iracundus, aliquantulum vitiis
deditus. Ipse siquidem locum illum laudabiliter omni ornatu, sicut hodierna die
apparet, decoravit, ecclesiam longitudine, latitudine, altitudine venustissime
ampliando fundavit, immo palliis, campanis, crucibus et omnibus monasticis
rebus adornavit, coenobium totum omni ex parte aedificiis et omni supellectili
renovavit. Huius siquidem studium ad omnia necessaria monasticae utilitatis
vigilabat, unde magnus discordiarum fomes, diaboli invidia instigante et
famulante, inter fratres monasterii contra eum oritur, et lamentabilis ira
scaturire coepit, scilicet per miseros fratres Demetrium et Cananum et
Golissonem presbyteros, homines tunc ineptos et iniuriosos, et alios complices
et fautores eorum, qui bachantes bachabantur, opere et sermone turpi contra eum
truces existentes. Rex autem supradictus, homo christianissimus, unice
diligebat eum, cuius gratia idem abbas in tantum sublimatus erat, ut fere omnes
Boemienses abbates dignitate praecellere videretur. Quam ob rem idem abbas
praesumptuose agens, episcopo suo officium praeripuit quadam summa festivitate.
Nam regis supra nominati capiti coronam imposuit, quod praesul suus Cosmas
facere debuit. Igitur iratus est episcopus Cosmas ei furore inextinguibili,
quare sibi calumpniis illatis, eum degradare conabatur, sed optimatum regalium
precibus continuis resistere non valens, vix debitori suo Bozetheco abbati
debitum iracundiae, licet non ex toto corde, dimisit, eo tamen tenore, uti
respondit ei idem ad ultimum episcopus: Sed quia tu, abba, bene nosti sculpere
et tornare, per sanctae obedientiae nostrae praeceptum ob diluendam culpam
tuam, quam ex contumacia tua praesumptuose perpetrasti, tibi praecipimus,
quatinus tuae longitudinis et latitudinis magnum mensuram crucifixum factum,
cum cruce in dorso tuo usque Romam deferas, et in ecclesia metropolitana sancti
Petri apostoli ponas. Haec ipse abbas lubenti animo cum cordis contritione
perficere non tardavit et maiestati praesulari satisfecit. Post aliquantum
tempus, quantum coenobii fratres, de quibus superius praemisimus, contra eum
zelotipiae venenum velut mortiferi serpentes conspiravere, nullo more dicendum;
nam unusquisque eorum accusationes quaerebat adversus eum, sed convenientia
testimonia non inveniebantur. Nam idem fratres, membra sathanae, existimabant,
si abbas iam nominatus quoquomodo expelleretur, sperabant aliquem ex eis, eorum
errorum complicem, abbatiae iura suscepturum. Rex autem Wratizlaus iam
migraverat ad dominum, cuius tunc successor Bracizlaus sublimitate ducatus
Boemiae pollebat. Huius aures cum supranotati fratres per se et per amicos
multis fictitiis et innumeris vituperiis contra abbatem suum Bozetechum
compositis obpulsando maltiplicarent, idem dux nominatum abbatem de loco
superius dicto extirpavit et fratres eiecit. Ibi impleta sunt verba veritatis:
Percutiam pastorem, et dispergentur oves gregis. Abbate itaque eiecto, eius
fratres, qui proditionis auctores contra eum extiterant, ex tunc erraverunt
usquequaque per incerta loca girovagi, donec ad ultimum aliqui corde compuncti
vix in loco proprio recepti, eidem loco inepti vitam finierunt, et libri linguae
eorum deleti omnino et disperditi, nequaquam ulterius in eodem loco
recitabuntur.
l045. Obiit Guntherus monachus et heremita VII Idus Octob. et sepultus est
in monasterio sanctorum Adalberti atque Benedicti ante altare sancti Stephani
prothomartyris.
l053. Procopius, primus abbas Zazavensis monasterii, felici fine cursum
vitae suae consummans, VIII Kal. Aprilis huius mundi exivit stadium, aeternae
felicitatis percepturus bravium.
1070. Indictione IV, epacta VI, concurrente II, III Kal. Julii praesul Gebehardus
consecravit ecclesiam in Zazoa in honore sanctae crucis, in cuius ara
continentur reliquiae sanctae crucis, de vestimento sanctae Mariae, sancti
Petri apostoli, sancti Stephani prothomartyris sanctique Georgii martyris.
1088. Sicque iustus vir, veluti dei martyr, miles Beneda, obiit V Idus
Julii, et sepultus est in urbe Missin ante portam monasterii sancti Johannis
apostoli et euangelistae.
1089. Obiit dominus Megnhardus, abbas sancti Adalberti monasterii
Breunouensis, a quo constructum est, cui successit Adalbertus.
1091. Et in hieme neque nix neque pluvia fuit.
1095. Eodem anno II Idus Octobris consecratum est oratorium in Zazoa a
venerabili sanctae Pragensis ecclesiae octavo episcopo Cosma, quod Bozetech,
eiusdem loci abbas, cuius supra meminimus, sui regiminis tempore construxit,
habens initium a dextris ab altari sancti Martini, a sinistris ab ara sancti
Stephani prothomartyris usque in finem criptae. In medio vero oratorii, quo
situm est altare, continet reliquias sancti Petri, sancti Pauli, sancti
Andreae, sancti Bartholomaei, sancti Thomae, sancti Jacobi, sancti Philippi,
sancti Lucae euangelistae, sancti Barnabae et omnium apostolorum. Sequenti vero
die, quod est Idus Octobris, consecrata sunt tria altaria, unum super criptam,
in quo continentur reliquiae de sudario domini, de spinea corona eius, de
sepulchro eiusdem, de sancta cruce, sanctae Mariae, sancti Johannis Baptistae,
sancti Johannis apostoli et euangelistae; aliud altare sub cripta, in quo
continentur reliquiae sanctorum Cosmae fratrumque eius; item in capella, quae
est a sinistra parte ecclesiae, altare, in quo continentur reliquiae sanctae
crucis, sancti Laurentii martyris, sancti Blasii episcopi et martyris, sancti
Mauritii martyris, sancti Pancratii martyris. Deinde tertia die, quod est XVII
Kal. Novembris, consecrata sunt duo altaria, unum a dextris, in quo continentur
reliquiae sancti Martini, sanctorum Johannis et Pauli, sancti Tiburtii
martyris, sancti Glebii et socii eius, sanctorum Benedicti, Johannis, Ysaac,
Mathaei, Christiani, sancti Nicolai, sancti Jeronimi, sancti Uodalrici, sancti
Fortunati, sancti Adolphii, sancti Lazari; aliud altare a sinistris, in quo
continentur reliquiae sancti Stephani protomartyris, sancti Andreae, sancti
Thomae apostolorum, sancti Clementis papae et martyris, sancti Georgii
martyris, sancti Pantaleonis martyris.
1097. Dux Bracizlaus cunctorum primatum terrae collaudatione et pontificis
Cosmae electione cum magno gaudio titulum Zazovensis abbatiae Diethardo
Breunovensi praeposito, III Non. Jan. imposuit, viro Latinis litteris
sufficienter imbuto, qui tunc in religione monachismi praeclarus habebatur.
Homo egregius, vultu decens, sollers ingenio, animo gravis, moribus gratus,
sermone cultissimus, ad loquendum parcus, infestus vitiis, tranquilissimus
adeo, ut nec vultum ex gaudio nec ex moerore mutaverit. A praesule igitur
Pragensi Cosma abbas VIII Idus Martii ordinatus est. Ad locum igitur, ad quem
abbas attitulatus extitit, dum primitus advenit, rebus monasticae
suppellectibus omnimodis adnichilatis, incommodum invenit in tantum, ut nec uno
mense eo victu, quem illic invenit, cum fratribus sustentari potuerit, nisi
supra nominatus dux adiumentum ex propria camera sua praebuisset. Divina autem
pietas eodem abbate vivente, in eodem loco non defuit, per quem eidem loco
adiutoria adaugendo bonis omnibus eum abundare redundareque fecit. Idem abbas
libros, quos non invenit loco sibi commisso praeter sclavonicos ipsemet nocte
et die immenso labore conscripsit, quosdam emit, quosdam scriptores scribere
conduxit et omnibus modis acquisivit. Oratorium tegulis et aliis ornatibus
renovavit. Praedecessorum suorum auctoritate dotalitia acquisita per ducum
terrae praecepta et inconvulsa decreta roborando in perpetuum confirmavit, et
per se aucta, scilicet mansiones, possessiones, mancipia, cartulatos, offertos,
servos et ancillas, terras et vineas, silvas cum montibus et planitiebus, aquis
et aquarum discursibus atque piscariis. Hic siquidem opere manuum etiam ultra
vires praesumebat laborans, maxime plantasiae intentus et cultui vinearum, et
ad omnes monasterii res omnino pervigil, mente semper revolvens scripta patris
stupendi: Otiositas est inimica animae. Tota vita sua ingratum habuit eum
fratrem, qui ad iniunctum opus se impotem et pigritia hebetem fecit, dicens,
esse quasi scelus ariolandi nolle obedientiae succumbere. Hic quamdiu vixit,
omnes fratres in bona voluntate complectens consolabatur, in eis pie vivendo,
ut pater in filiis, eos ad coelestia regna, sicut aquila provocans, ad volandum
pullos suos volitans, provocabat. In quo revera mutatio dextrae excelsi est
completa, dum vixit. Tandem ipso maturam iam aetatem subeunte misit deus
caatigationem languoris in membra eius, prout ipse postularat, quia quem
dominus diligit, corripit, unde fatigabatur in visceribus vexatione nimia nocte
et die, donec universae carnis viam ingressus est XV Kal. Jan. Rexit autem
locum eundem annis XXXVII, mensibus IX, diebus XI.
1116. Eodem anno
Dum viget Hermannus Pragensi pontificatu,
Est sublimatus Silvester presbyteratu.
1122. Eodem anno III Non. Jan.
Pater eximius et Christi cultor honestus,
Koyatha mortalis subiit ius conditionis.
1123. Eodem anno 12 Kal. Aprilis Silvester divina dictante miseratione coenobialis
vitae succensus ardore, exitialibus mundi renuntiavit versutiis, et in
monasterio Zazovensi sub regimine bonae memoriae Diethardi abbatis mutato
seculari habitu, totum se penitus divinis mancipavit studiis, post amplexus
videlicet lippientis Lyae Rachelis delectatus pulchritudine, et post Marthae
laborem Mariae consequi desiderans consolationem. Cuius quanta fuerit
diligentia in divinis et ecclesiasticis rebus amplificandis, loco suo dicetur.
1125, XII Kal. Aprilis in festo scilicet sancti Benedicti abbatis, Silvester
fecit professionem, et monachus effectus, in divinae religionis exercitio in
tantum auctore deo profecit, ut merito cunctis tam honorabilis quam amabilis
haberetur. Unde postea factum est, ut tanquam secundus pater in congregatione
decaniae sublimaretur honore.
1126. Igitur glorioso duce Sobezlao in solium paternae gloriae cum omnium
Boemiae principum exultatione sublimato, fit ingens omnium laetitia, eo quod
boni ducis principia superna, sicut cernere erat, comitabatur gratia, et quod
eo anno, quod difficile credi potuit, inter ipsum ducem et Ottonem nulla fuit
facta sanguinis effusio. Sed proh dolor! urgente vesania antiqui hostis
discordiam et intestina bella ubique seminantis, gaudia nostra contrarius
excepit successus. Succedente enim anno dux praetitulatus Otto ultra modum
anxiatus, quia spei suae voto fuerat frustratus, optimum ratus fore consilium,
sed minus caute sibi providens in futurum, accelerat viam cum suis ad regem
Lotharium et ad totius Saxoniae principes. Honore igitur condigno receptus,
nacta loci temporisque oportunitate, causam sui itineris coram omnibus
exposuit, Sobezlaum scilicet ducem Boemiam furtivis intrasse vestigiis, et
principalem tronum sibi hereditario iure debitum et ab omnibus Boemiae
primatibus designatum et sacramento confirmatum occupasse per violentiam; et ad
ultimum haec breviter subintulit: Vestrae ergo dignationis, optime imperator,
super hac causa pietas providere non abnuat, vos ex omnibus totius regni
principibus divinae dispositionis gratia imperatoriae dignitatis ad hoc
sublimavit excellentia, quatinus a benignitate vestra omnibus pro quibuslibet
suis incommodis requirentibus misericordia exhibeatur et iustitia. Scimus
equidem nos vestrae maiestatis imperii in omnibus subiacere debere, ideoque
nichilominus iustitiae rationem nobis ex vestra dignatione non esse denegandam.
Ad haec rex benigna responsione mitigat ducis animum, et coram omnibus Saxoniae
principibus his verbis dicitur usus: Boemiae ducatus, sicut ab antecessoribus
nostris didicimus, in potestate Romani imperatoris ab initio constitit, nec fas
fuit unquam electionem aut promotionem cuiusquam ducis in terra illa fieri,
nisi quam imperialis maiestas suae auctoritatis gratia initiaret, consummaret
et confirmaret; unde qui contra hanc constitutionem praesumere nisus est,
nostrae maiestatis contemptorem esse satis evidens est, nec tibi soli sed et
nobis totique regno contumeliam non modicam esse irrogatam, quod minime
aequanimiter ferendum est. Quid plura? Rex et omnes principes et primi quique
Saxoniae duci Ottoni dant et confirmant fidem, quod non alius praeter ipsum in
Boemia sit regnaturus. Interim callidus immo providus nimium dux singillatim
quemque ex Saxoniae optimatibus convenire satagit, dona infinita et, ut
dicitur, aureos montes promittit, quatenus omnium animos ad ferendum sibi
praesidium potuisset habere promptissimos.
Relatum est igitur duci Sobezlao, regem Lotharium minari Boemiis, bella
parare, regni devastationem machinari, nisi citius Sobezlao depulso Ottonem
sibi ducem intronizari consentiant. Sed dux Sobezlaus nichil penitus his motus
rumoribus modificata voce breviter respondit: Spero in dei misericordia et in
meritis sanctorum martyrum Christi Wencezlai atque Adalberti, quia non tradetur
terra nostra in manus alienigenarum. Ex hinc ergo prudentissimus dux iactans
totum cogitatum suum in domino, circuivit omnia monasteria, divina implorans in
adversis eventibus sibi adminiculari praesidia. Postquam autem cognovit regem
Lotharium cum valida Saxonum manu Boemicis appropinquare terminis, festinavit
ei occurrere ad castrum, quod Hlumec dicitur. Sequenti die consedente duce
Sobezlao cum suis ad prandendum, venerunt, qui dicerent: Optime dux, tu
deliciis ciborum intendis et minus caute agis, quia iam ecce, nisi ocius obvies
eis, hostium enses cervicibus nostris dominabuntur. Mox ergo fit clamor in
castris, ut sit unusquisque paratus. Praemittit interim dux Sobezlaus legatos
Nazcerat, Miroslaum, Zmilonem et alios ex primatibus suis ad regem haec verba
deferentes: Haec dicit Sobezlaus: Discretionem tuam, bone imperator, scire
convenit, quod electio ducis Boemiae, sicut ab antecessoribus nostris
accepimus, nunquam in imperatoris semper autem in Boemiae principum constitit
arbitrio, in tua vero potestate electionis sola confirmatio. Sine causa novae
legis iugo nos constringere conaris. Scias, nos nullatenus ad id consentire
magisque pro iustitia pie velle occumbere, quam iniustis decretis cedere, et
revera, nisi ab hac molitione desistas, in proximo est, omnipotentis dei
iudicium inter nos inposterum memorabile seculis ostendat prodigium. Visa sunt
autem haec dicta regi et omni exercitui eius quasi deliramenta. Dux siquidem
Otto regi omnem spondebat securitatem, eo quod omnes sublimiores Boemiae fidei
suae firmam ei fecissent sponsionem, nec dicebat armis opus esse, sed magis qui
vellent cum falconibus et accipitribus terram ingredi absque ullo offendiculo
possent. Ergo XII Kal. Martii procedunt Saxonum male securi inter duos montes
cuneorum globi, et quia densissima nix viae difficultatem fecerat, plurimi
armis depositis pedites incedebant. Sed cum inter angusta faucium utriusque
montis devenissent, ubi velut coelitus eis inclusis omnis fugiendi sublata erat
facultas, dux Sobezlaus dividens suos in tres scaras, subito impetu in eos proruit,
et quotquot ex adversa parte constiterant, omnes in ore gladii excepit. Ibi dux
Otto, huius mali minister, corruit, ibi plurimi Saxoniae optimates prostrati
sunt, et vix quisquam elabi potuit, nisi forte qui ad sarcinas tuendas eminus
vel circa latus regis constiterant. Peracta ergo illa die tam miserabili caede,
dirigit rex nuntios pro Sobezlao duce, mandans et rogans, ut veniat ad se. Qui
nichil adversi veritus, assumptis secum paucis ex primatibus regem adiit, et
stans prior his eum verbis affatur: Non nostrae temeritatis insolentia nos,
optime rex, ad tuas impulit iniurias, non superba nos praesumptio ad effusionem
sanguinis tuorum commovit procerum. Nullum sane dampnum vel dedecus tuae
maiestati moliti fuimus, sed sicut saepius ante tibi per legatos nostros
innotuimus, novae legis iugo, quod nec patres nostri portare potuerunt, nostras
cervices subdere noluimus, et ecce, divinum iudicium utriusque nostrum
iustitiae manifestum dedit indicium, et indebitae dissensionis omnemque
utrarumque partium ademit occasionem. Cessent ergo vel iam causae omnis
discordiae, redeat unitas concordiae. Omnis iustitiae debitum, quam
antecessores nostri regiae maiestati exhibuerunt, nos quoque nichilominus rebus
et persona nostra, loco et tempore impendere parati sumus. Ad haec rex: Nisi,
inquit, dux Otto summa vi precum toto proposito nos obviare compulisset, nulla
prorsus ratione cogente animus noster ad hoc flecti potuisset, ut cuiquam
principum nec digitum contra te extendere licuisset. Anuuente ergo et favente
deo ducatus honore et solio fruere paterno, mutuae dilectionis et amicitiae
vinculum nobis et toti regno conserves inconvulsum. Et haec dicens tradidit ei
per manum insigne ducatus vexillum, et ita datis invicem osculis dux Sobezlaus
cum maxima gloria et honore suorumque ingenti tripudio ad dulcem suam rediens
metropolim annis XVI optato potitus est solio.
Eodem anno XI Kal. Martii Johannes, episcopus sextus sanctae Olomucensis
ecclesiae, vinculis carnis absolutus, talentum sibi creditum Christo reportavit
centuplicatum. Post hunc Sdico praesul successit in ordine septimus, et eodem
anno ordinatus est VI Non. Octobris.
Eodem anno obiit Zvatava regina, mater Sobezlai ducis, Kal. Septembris.
1127. Obiit domnus Clemens, abbas sanctorum Adalberti atque Benedicti monasterii
Breunovensis, cui successit Uodalricus.
Eodem anno Mileysi deo devota famula, nulli pietate secunda, placitis dei
moribus cordetenus intenta, quatenus ex divina gratia excessuum suorum sibi
daretur indulgentia, Romae sanctorum apostolorum adiit limina, et eodem anno
reversa, felici consummatione huius vitae studium est egressa IV Idus Julii.
1128.
1129.
1130. Meginhartus, episcopus Boemorum, adiit Jerosolimam. Item hoc anno Kal.
Martii obiit Wacezlaus, dux Moraviensis, totius christianitatis pater et
clericorum amator.
Eodem anno VII Kal. Maii immensum signum apparuit, et tonitruum horribile
auditum est.
Eodem anno XI Kal. Julii Sobezlaus, dux Boemorum, insidiatores vitae suae
quosdam decollavit in foro Pragensi publice, quosdam pedibus ac manibus ac
linguis et visu privavit. Bracizlaus, filius Bracizlai ducis, privatus est
oculis.
1131. Elevatae sunt reliquiae sancti Godehardi episcopi et confessoris,
mirae sanctitatis viri.
Eodem anno Silvester, prior Zazovensis monasterii, adiit Romam.
1132. Pribizlawa, coniunx Groznatae, suae fecit terminum vitae. De cuius pia
conversatione quaedam fidelium memoriae stili officio summatim commendare satis
ad rem arbitramur pertinere. In cuius moribus, dum in carne vixit, et deo
placuisse confidimus, et hominibus deum diligentibus omnigenae virtutis
speculum constitisse vidimus. Totius namque vitae suae tempore familiare
studium habuit cultum dei intime diligere, nichil amori eius praeponere,
pauperum Christi ex visceribus pietatis matrem se exhibere, personis quoque dei
servitio mancipatis tota mentis sinceritate ac devotione honorem et adiutorium,
prout res exegisset, offere. Bona quidem legali iuncta marito fuit, melior
deinde in viduitate permansit, optima post lacrimabilem dilecti et unici filii
sui Severi humationem effulsit. Haec desiderio videndi sepulchrum domini
flagrans, cum domno Megnhardo episcopo et cum aliis Jerosolimam adiit, et
prospero successu ad sua rediit. Postquam vero tempus decessionis suae ex hac
vita appropinquavit, et viribus corporis se destitui persensit, convocatis ad
se cunctis suae cognationis natu et honore prioribus, villam Goztivar cum silva
adiacente, agris et pratis et omni proprietate sua, quam inibi possidebat, nec
non et omnem familiam suam, villam etiam Bosakouic ad hospitale deo et sancto
Johanni Baptistae in Zazou, omnibus suis affinibus in id ipsum consentientibus,
obtulit et sub legitimis testibus confirmavit. Et sic paucis interpositis
diebus in eodem coenobio generalis resurrectionis diem expectatura, felici requie
fruitura, V Non. Maii exiit ex huius mundi pressura.
1133. Diethardus abbas, cuius superius mentionem fecimus, in senectute bona
XV Kal. Jan. felicem animam domino commendavit.
Eodem anno Boemii vastaverunt Poloniam.
Eodem anno eclipsis solis fuit media die.
1134. Obiit Bogudar Kal. Februarii. Silvester, prior Zazovensis monasterii,
post depositionem pii patris Diethardi unanimi fratrum consilio et concordi
voto IX Kal. Maii in abbatem eiusdem monasterii electus est, vir morum
honestate cunctis amabilis, colloquio plurimum affabilis, in abstinentia
singularis, amicus humilitatis, intimus verae caritatis alumnus, toti fratrum
congregationi adeo cum vinculo familiaritatis et dilectionis sese adstringens,
ut omnibus plus amori quam timori haberetur. Revoluto ergo eiusdem anni
circulo, item IX Kal. Maii, metropoli per manum Sobezlai ducis abbatili
suscepto baculo, a Johanne, venerabili episcopo, ordinatus est. Divinitus
igitur tam decenti sublimatus honore, bonus pastor ad suo moderamini commissa
dulcia cum omnium suorum exultatione revertitur ovilia. Hic locus sese tulit,
quod superius promisimus absolvere, quanto scilicet in sanctae religionis
studio flagraverit amore, et quam diligens cura sibi fuerit in meliorandis
rebus et amplificandis monasterii. In quantum siquidem praevaluit et novit,
omnem monasticam disciplinam fratrum suorum cordibus saepius inculcare solitus
fuit. Res superfluas privatas contra licitum possidere gravissimum crimen esse
docebat, dicens: monachum victum et vestitum habentem his debere esse
contentum. Specialiter quoque humilitatis et patientiae omnibus in se
praetendebat exemplum, illud semper revolvens: Quanto magnus es, humilia te in
omnibus. Hic tempore sui regiminis capellam sanctae dei genitrici construxit,
monasterium sancti Johannis Baptistae picturae venustate decoravit, muros cum
absidibus in medio oratorii ab altaribus sancti Stephani et sancti Martini
interposuit, pavimentum ecclesiae lapidibus politis de Petrino monte advectis
adornavit, dormitorium, refectorium, cellarium et coquinam atriumque claustri
per circuitum cum collumpnellis et absidiculis venustissime construxit. In
villa Mnichovici nuncupata basilicam in honorem sancti Michaelis et omnium
coelestium virtutum aedificavit. Quid plura? Omnis eius intentio, omne studium,
omnis sollicitudo, quoad vixit, in hoc praecipue perstitit, quatenus domui dei
in omnibus utilem se exhiberet.
Eodem anno obiit dominus Megnhardus, decimus episcopus sanctae Pragensis
ecclesiae, V Non. Julii, monachorum et clericorum verus amator, pauperum et
peregrinorum pius consolator, cui successit Johannes.
1135. XIII. Kal. Martii facta est ordinatio domni Johannis, undecimi
episcopi Pragensis.
Eodem anno facta est confirmatio ordinis sancti Augustini ad Praemonstratam
ecclesiam per Innocentium papam in civitate Pysis V Non. Maii.
1136.
1137. Silvester abbas una cum domino Heinrico, Olomucensi episcopo, et cum
aliis instinctu divinae inspirationis orationis causa Jerosolimam perrexit,
interim coenobii sui gubernacula domino Beroni, eiusdem loci decano, procuranda
committens. In eodem anno IX Kal. Jan. prosperis austri flatibus rediit, in quo
itinere miles deo devotus Ruzin defunctus est III Idus Octobris.
Eodem anno II Non. Decembris Lotharius, Romanorum imperator, pauperum et
peregrinorum pius consolator, migravit ab hoc mundo, cui successit Cuonradus.
Lupoldus dux pulsus est de Moravia.
1138.
1139. Domnus Heinricus, episcopus Olomucensis reverendissimus, Romam causa
orationis profectus est.
Eodem anno domnus Johannes, episcopus undecimus sanctae Pragensis ecclesiae,
clericorum et monachorum verus amator, pauperum et peregrinorum pius
consolator, VI Idus Augusti migravit ab hoc seculo, cui eodem anno Silvester,
Zazovensis ecclesiae abbas, vir vere Israelita, successit in episcopatum. Sed sequenti
anno, deo, a quo omnia bona procedunt, inspirante, sano usus consilio, secum
saepius retractans, semetipsum minus sufficere posse ad tam grande pondus
episcopalis regiminis, et illud apostolicum: Nemo militans deo implicat se
negotiis secularibus et cetera, eundem episcopatum cum bona voluntate dimisit,
suamque abbatiam recepit.
1140. Sobezlaus, dux Boemicus, XVI Kal. Martii mortalibus exutus artubus,
viam universae carnis ingressus, cui eodem anno XIII Kal. Martii Wladizlaus, filius
Wladizlai ducis, successit in principatu. Eademque tempestate renuente domno
abbate Silvestro episcopatum Boemicum, Otto, Pragensis ecclesiae canonicus et
praepositus, electus est in episcopum, et eodem anno ordinatus est VII Kal.
Julii.
Eodem anno XVII Kal. Octobris obiit Adleyth ductrix.
1141. Spitigneus, filius Borivoy ducis, Mirozlau, Mukar causa orationis
Jerosolimam perrexerunt mense Januario.
Eodem anno fuit inundatio aquarum in Boemia.
1142. Nacerat comes et alii primates Boemiae adversus ducem Wladizlaum
conspiraverunt, et uniti Moraviensibus Boemiam magna manu hostiliter
intraverunt. Deinde bello congressi, Boemis cedentibus, Pragam obsederunt, et
monasteria sanctorum Viti, Wencezlai atque Adalberti sanctique Georgii incendio
vastaverunt. Tandem superveniente rege Romanorum Cuonrado depulsi ab obsidione
urbis recesserunt et Moraviam redierunt, et interventu cardinalis Widonis et
episcoporum Ottonis, Henrici atque abbatum digna satisfactione in pacis foedus
convenerunt.
Eodem anno synagoga Judaeorum et multa aedificia combusta sunt in suburbio
Pragensi. Visus est serpens volare.
Eodem anno III Idus Julii obiit Kerberk, coniunx Boriwoy.
1143. Wladizlaus, dux Boemorum, Moraviam incendio vastavit.
Eodem anno legatus apostolici separavit sacerdotes ab uxoribus.
Eodem anno inventio capitis sancti Adalberti episcopi et martyris in urbe
Praga in ecclesia sancti Viti martyris, et cilicium sancti Wencezlai inventum
est.
Eodem anno venerabilis dedicatio monasterii sanctorum Viti, Wencezlai atque
Adalberti II Kal. Octobris a tribus episcopis, Ottone Pragensi et Heinrico
Olomucensi et Babenbergensi episcopo.
Eodem anno religiosus papa Innocentius migravit ad dominum.
1144. Quido cardinalis et legatus apostolicae sedis, cassis quorundam
incitatus delationibus, Silvestrum abbatem suspendit ab officio, sed sequenti
anno per domnum Heinricum, Olomucensem episcopum, redeuntem restituit.
1145.
1146. Dedicatio capellae sanctae Mariae in Zazoa a venerabili episcopo
Ottone, quam construxit domnus Silvester abbas.
1147. Venerabilis abbas Clarevallensis Bernhardus, deo et hominibus carus,
audiens invasionem et persecutionem, quam Sanguin paganus fecit in confinio
Jerusalem, sicuti Mathathias adhortabatur filios suos, sic adhortatus est regem
Franciae Luodewicum omnesque Francigenas gentes armata manu in expeditione dei
ire Ierusalem, animasque pro fratribus ponere, nec non christianam gentem de
gladio paganorum auxilio dei liberare, cuius admonicione Franciis gentes
Francianae, Anglicae, Lotharingiae, Saxones, Boemienses, Suevienses,
Bawarienses cum ferocibus Francis ad expeditionem domini sunt paratae. Commotio
christianorum facta est in paganos. Eadem tempestate verbiger Sdico, episcopus
Moraviensis, adiit Pruzos cum Heinrico, decano Pragensis ecclesiae, ad
praedicationem, et eodem anno est reversus.
Eodem anno II Idus Junii obiit Izcizlaus quintus abbas Postolopertensis
ecclesiae, cui successit Bero Zazovensis monasterii decanus, et eodem anno
ordinatus est VII Idus Decembris.
1148. VI Idus Julii Otto, duodecimus episcopus sanctae Pragensis ecclesiae,
obiit, cui successit Daniel, praepositus eiusdem ecclesiae.
A. dom. 1149 ordinatus est Daniel episcopus a maguntino archipraesule.
A. dom. 1150 vir clarus vita Sdico, septimus episcopus Olomucensis ecclesiae,
subtrahitur ab hoc mundo, victurus perpete vita, cui successit Johannes,
canonicus de monte Ztragov.
Eodem anno obiit Gertrudis, ducissa Boemiae.
A. dom. 1152.
A. d. 1153 obiit papa Eugenius, vir vita magnificus, cui successit
Anastasius.
A. dom.1154. Jam die deficiente crepusculoque noctis imminere incipiente
eclipsim luna passa est. Post haec maxima mortalitas in homines irrepsit.
A. dom. 1155 fratres nostri Arsenius, Sizna, Radosta hac vita exempti sunt.
A. d. 1156 Bero, Postolopertensis abbas, V Idus Maii, heu! immatura morte
diem clausit extremum. Hic siquidem secunda aetatis suae vigilia, domini
aspirante gratia, semetipsum in ara crucis Christi hoc in coenobio obtulit
holocaustum deo. Vir caritatis virtute plenus, simplex et castus in moribus,
voluntarie paupertatis specialis amicus, qui ob meritum sanctae religionis
primo apud nos honore decaniae, deinde Postolopertensis in monasterio per
domnum Ottonem episcopum abbatiae est culmine sublimatus. Praefuit autem eidem
ecclesiae annis VIII, mensibus IV, diebus XXXV.
1157. V Idus Januarii Spitigneus dux, immo flos et honor ducum, proh dolor!
nimis intempestiva morte vitae praesentis accepit terminum, vir prae ceteris
divinae pietatis dote magnifice praeditus, et ut pace omnium dictum sit, totus ex
omni virtutum elegantia compositus, cuius qui digne meminit, dolore et lacrimis
nequaquam carere poterit. Cecidit quippe aureus ecclesiae dei clypeus,
clericorum pater, pupillorum mater, moerentium intimus consolator, totius
honestatis et bonitatis sollertissimus indagator, cui virtus amor, vitium fuit
horrori, cuius in iudicio arcem victoriae misericordia et veritas semper
obtinuit. Ad miserendum denique nullus eo facilior, ad irascendum et
vindicandum in reos nemo difficilior. Quem etiam deus virga benignae suae
correctionis multo tempore in praesenti flagellavit, sed baculum consolationis
ad percipienda vitae futurae praemia reservavit. Longa siquidem et difficilia
apud exteras nationes passus exilia, tandem tam praeceptione quam petitione
Friderici, Romani imperatoris, a Wladizlao duce recipitur in patria, sed brevi
temporis interstitio, fatis urgentibus migrat ab hoc seculo, pro temporali
dispendio felicitatis aeternae beandus solatio.
Eodem anno XIII Kal. Febr. Fridericus, abbas Postolopertensis, vir in
divinis et humanis rebus summae discretionis, erga deum et homines devotae
sinceritatis, intimae ad omnes affabilitatis, peracto itinere cum domno Daniele
pontifice in terram Hunorum abierat, quoniam videlicet idem antistes et
Heinricus, frater Wladizlai ducis, cum aliis Boemicae terrae primatibus filiam
Ungarici regis Friderico, filio eiusdem ducis, disponsandam detulerunt. In
reditu in quandam villam suam pausandi gratia deveniens, post trium dierum
egritudinem ultimum exhalavit spiritum.
Eiusdem quoque anni XI Martii Kalendis Johannes, Olomucensis ecclesiae
episcopus, qui de monasterio sancti Augustini Ztragov assumptus fuerat, vitam
terminavit praesentem, medio sane iuventutis constitutus flore, sed maturus
morum nobilitate. Hic pro defensione iustitiae et statu ac honore sanctae dei
ecclesiae semper, quantum in ipso fuit, inconvulsus proeliator perstitit,
difficilis inobedientibus, facilis ac promtus et affabilis deum diligentibus.
Cui ex quo episcopalem suscepit infulam in corde, in habitu et sermone
praecipua semper extitit humilitatis custodia, adeo ut plerumque etiam ab
humilioribus personis venerari refugeret, dicens, non oportere se exigere
honorem ab hominibus, utpote qui de eodem luto conditus esset.
De probitate Wladizlai regis et
fratris eius Theobaldi ducis
Anno sub eodem Fridericus imperator, iuncto sibi duce Wladizlao et fratre
eius Theobaldo, Poloniam exercitu valido intravit, principes eius, Bolezlaum et
Mesconem, suae ditioni subiugavit, infinitam pecuniam in auro et argento
accepit, et pro confirmatione et stabilitate deinceps pacis filios eorum
obsides suscipiens, victoria pro voto potitus rediit. Pro cuius sane pacis
compositione praecipue ducis Wladizlai institit illustris industria; tantum
enim imperatoriae voluntati se tunc benevolum exhibuit, ut per se tantum et
suos vel ad deditionem praefatos principes flectere vellet, vel si necessitas
rei poposcisset, ipse primus cum illis pugnam anticiparet. Imperator vero, ut
dictum est, cupito potitus honore, ad sedem suam reversus est. Jam, scilicet
anno ab anno incarnat. 1158 initiato, quid Boemico duci pro labore suo
recompensationis exhibere debuisset, cum principibus regni consilium habuit.
Dum ergo plures eorum assererent, dignum sibi videri optimis muneribus auri et
argenti iuxta imperatoriam munificentiam ipsum remunerari debere, imperator
liberiori usus consilio, ducem ad se accersitum huius verbi nobilitate
alloquitur. Virtutis tuae constantia nobis optime complacuit, nam et
fidelitatis tuae erga nos siceritas toti regno evidenter innotuit, quam
fideliter, quam devote, et quam intime nostrum, immo totius regni integrum
secundum deum diligas statum, cum in nostris necessitatibus et totius regni rei
publicae tui ipsius tuorumque vitam periculo obiicere nunquam haesitaveris.
Hanc igitur egregiam virtutem in te considerantes ac diligentes, et de cetero
te erga nostram imperatoriam serenitatem fidelem et incommutabilem haberi
cupientes, honore quo ipse volueris te secundum nostram liberalitatem honorare
decrevimus. Attamen quia terram tuam auro et argento et omnium pretiosarum
rerum copia scimus redundare, et nichil in talibus tibi rarum existere, accipe
ex dei gratia et nostra benevolentia tibi, quam tradimus, regni coronam et
regiae potestatis et honoris dignitatem in regno tuo. Et haec dicens iussit
proferri coronam auream gemmis, pretiosis lapidibus mire adornatam, qua
videlicet ipse imperator in summis festivitatibus uti ferebatur. Tali igitur
divinitus honore sublimatus, gloriosus dux Wladizlaus cum ingenti tripudio et laetitia
suorum rediit ad sua.
Deinde eiusdem anni mense Maio profecti sunt rex et frater eius dux
Theobaldus cum caesare Friderico in Italiam adversus Mediolanenses, qui tunc
imperatorem pro quadam seditione contra Laudunenses ac Nolanae urbis cives
facta sibi graviter offensum habebant. Decreverat siquidem imperator non prius
se cum exercitu ab urbe discessurum, quam hostibus suis igne et ferro meritam
rependeret ultionem. Ibi gloriosus rex et vere glorificandus Wladizlaus cum
suis optimatibus, veluti quondam Judas Machabaeus, modo frontes adversariorum
conterendo, modo a tergo insequendo, modo etiam a dextris et a sinistris
acriter insistendo, quod proelia laudabiliter ac victoriose peregerit, dictu
longum est. Attamen quia in bellicis certaminibus victoriae proventus plerumque
sit incertus, et varii casus vices diversas et difficiles in talibus ludunt,
fieri non potuit, quin et ipse quosdam ex suis primatibus illic amitteret.
Mediolani igitur cives egregiam eius virtutem et industriam considerantes, et quia
caesari foret acceptissimus, legatis ad ipsum et precibus directis, mediatorem
eum inter se et caesarem esse pro offerenda digna satisfactione et pacis
compositione deprecati sunt. Ipsius ergo annuente prudenti consilio et
sedulitate, praefatae cives urbis potiti sunt pace.
A. d. 1159 Daniel episcopus Mediolanum ad caesarem Fridericum profectus est,
a quo benigne et honorifice susceptus est, quem in obsequio suo suis et regni
negotiis biennio implicatum retinuit. Interim Romae defuncto Anastasio, apostolicae
sedis pontifice, gravi exorta seditione, duo ex contrariis partibus apostolicae
sedi praeficiendi electi sunt, Alexander et Victor. Pro qua dirimenda seditione
Daniel praesul Romam dirigitur, ut videlicet utraque persona caesaris et totius
regni concilio interesse debeat, et iuxta publicam et canonicam sanctionem is,
qui magis competeret, apostolicae sedis principatum obtineret. In eo sane
concilio coram cunctis regni principibus et CL episcopis Victor iustitiae
victoriam obtinuit, et concordi omnium voto et acclamatione archisterium
apostolicae sedis suscepit. His igitur rite terminatis Daniel praesul a caesare
et apostolico multo sublimatus honore, excellentia quoque functus legationis
apostolicae, proficiscitur ad regem Hunorum, et exinde ad propriam Pragensis
pontificatus sedem anno dominicae incarnationis 1160, in omnibus auctore deo
prospere agens, regreditur.
A. dom. inc. 1161 IV Idus Febr. Silvester, Zazovensis abbas, regiminis sui
XXVIII anno exiit a tenebris huius corporeae regionis ad patriam perpetuae
mansionis, pro labore praesentis vitae recepturus bravium beatae
remunerationis. Vir omnium virtutum disciplina et morum elegantia decenter
insignitus, atque adeo practicae exercitiis ac theoriae amori deditus, ut
evidenter adverti potuisset, hominem licet adhuc in carne positum, totum tamen
spiritus sui fervore iam in coelestibus constitutum. Specialis enim erat amicus
parsimoniae, qui lautiores dapes vel vini pocula ceu quasdam morborum materias
abhorrebat, sed cibo simplici et pura fluminis unda delectabatur, convivia
potentum et quarumlibet secularium personarum detestabatur, propter quod etiam
a pluribus minus diligebatur, quia in talibus nulli se communem exhibebat. De
cuius vitae laudabili qualitate multa quidem ad exemplum pie vivendi et honestatis
formam dici possent, sed quia superius iam inde me ex parte dixisse memini, et
maxime quomodo operum eius in eodem monasterio magnalia, quanta fuerint ei erga
divini cultus honorem studia, evidenter extant testimonia perhibentia, hoc in
loco ista sufficiant. Hoc tantum, salva omnium gratia, dixerim,
Quod locus ille patrem, vix invenit sibi talem
Moribus et vita, ceu Silvester fuit abba.
Huius post obitum Bozata, eiusdem loci prior, eodem anno per Wladizlai regis
et episcopi Danielis electionem in abbatiam successit, qui brevi tempore,
exacto unius videlicet anni spatio, sui regiminis curam propria voluntate
deposuit. Hic namque in coenobiali conversatione iam XXX compleverat annos, ac
a tumultu secularium actionum adeo se alienum effecerat, ut nulla penitus
ratione, quid in seculo ageretur, sese vel scire modicum pateretur, ideoque ad
disponendas exteriores monasterii utilitates, vel ad popularium quaestionum
examinanda iudicia prorsus extitit ignarus. Praeterea tot et tam gravium
infirmitatum detinebatur molestiis, ut vix aliquando, quantacunque necessitas
exegisset, pro utilitate ecclesiae extra monasterii septa procedere potuisset.
His igitur et similibus devictus incommodis, post anni circulum onus deposuit
suscepti regiminis.
Eodem anno ducellus Sobezlaus noctu fecit irruptionem cum LX armatis
militibus in urbem Olomucz; omnes fere, quos in ea reperit, diversis opprobriis
dehonestari fecit. Quae mox fama volans Wladizlai regis perculit aures, qui
collecto exercitu dictam circumdedit urbem; sed cum cerneret forti custodia
militum inaccessabilem sibi suisque fore urbis aditum, cautius arbitratus est
magis ex ingenio quam bello iuvenilem principis animum attemptare. Per
internuntios ducem invitat ad pacem, immo spondet et firmat, quam velit pacis
accipere conditionem. Princeps igitur, ut simplicissimus agnus, nil adversi
ratus, it regis in manus, pax et pacis conditio iuramenti confirmatur
sacramento. Ibi Johannes, episcopus Moraviae, illic iurat omnis primatus
Boemiae, sicut rex dictat pro pacis et fidei confirmatione. Sed ubi fides?
Sacramenta violantur, pactio pacis exinanitur, rapitur, cathenatur princeps
egregiae probitatis, et in castro munitissimo Prinda sub districtissima
custodia multo tempore macerandus retruditur.
A. d. inc.1162 divina annuente pietate, regisque Wladizlai ac etiam domni
Danielis pontificis industria procurante, Regnardus, abbas Zazovensis
monasterii, gubernacula suscepit. Hic primo Syloense coenobium admodum honeste
rexit, proprioque labore in possessionibus diversi generis magnifice ampliavit.
Primo autem anno ordinationis domni Danielis episcopi insurrexerunt quidam viri
iniquitatis contra eundem abbatem, virum venerandum, et quaecunque criminosa de
ipso potuerunt confingere, auribus pontificis crebra et importuna delatione
veriti non sunt inculcare, et quia, sicut beatus dicit Gregorius, animo in
multis occupato facile ab adulatoribus subripitur, rem ita, ut conficta erat,
episcopus esse credidit. Vix itaque venerabilis Regnardus sine canonica
audientia, nec accusatoribus seu testibus legitimis convictus, vel confessus de
obiectione criminis, abbatiae privatur honore, reicitur de monasterio cum
universa sibi dilecta congregatione. Mirum sane de tanto viro, domno videlicet
episcopo, quod tam crudelem et tam praecipitem in pastorem simul et ovile
potuit dare sententiam, et quod nulli prorsus parcendum ob unius accusationem
iudicavit, nisi forte, ut quidam tunc coniciebant, sicut et postmodum rerum
probavit eventus, hac occasaione id eum fecisse, ut quibusdam Augustiniani ordinis
regularibus, de exteris ascitis nationibus, eundem locnm commendaret.
Praedictus vero domnus Reginhardus quarto decimo post depositionem sui
regiminis anno, tribulationes eius et patientiam domino misericorditer
respiciente, Zazovensis coenobii abba constituitur, Metensis genere,
discretissimus moderator vitae monasticae, dilectionis et affabilitatis gratia
praeditus, humilitatis et mansuetudinis virtute constantissimus, omni morum
elegantia melioribus per omnia comparandus. Cui pro hominum suorum defensione
stare vigilantissima semper cura fuit, cui pro assertione veritatis nec regia
maiestas nec principum potestas terrorem vel ruborem unquam incutere valuit,
cuius animum nec prosperitas ad inanem unquam emollivit laetitiam, nec
adversitas ad pernitiosam deiecit moestitiam; vir in cunctis suis eventibus
eundem laetitiae semper praeferens vultum. Universae congregationi plus amore
quam terrore studebat praeesse, tantum namque humilitati se subdiderat, ut cum
esset omnium in congregatione dignior et sublimior, in omnibus suis actibus
subiectione se exhiberet. Ad humilia etiam quaeque opera nullus eo promtior,
nullus agilior, nullus efficacior; fuit in eo peritia pingere vel sculpere
quaslibet imagines ligno vel osse vel etiam diversi generis metallo, fabrilis
quoque non ignarus fuit artis, et omnis, quae ex vitro fieri solet,
compositionis.