[1559-08-19 - PRAHA]

[1559-08-19 - PRAHA]

Catalogus personarum residentiae Oybinensis et collegii Pragensis

19. Augusti 1559

Catalogus fratrum Societatis Iesu oybinensium

P. M. Cornelius Brogelmans professus non meminit quot annos fuit in Societate. Diu studuit, parum docuit, animum habere professi, credo. Mcdiocribus nunc fruitur corporis viribus. Non est multum activus. Ex se nec videtur ad docendum aptus.

P. Lucas [Molitoris] (ut ait 30 annorum circiter, 4 cum dimidio fuit in Societate; robustus corpore et animo erga vocationem, sed simplicitate indigens aliquando iudicii. Per medium annum dicit se Romae in humilioribus officiis versatum. Studuit logicae et theologiae circiter annum cum dimidio. Hic concionatus est ultra annum. Ad rusticos mediocriter est aptus, aliis non puto. Parum scit, in rebus familiae est versatus.

Florianus [Sylvius] 25 circiter natus annos, ultra 4 annos fuit in Societate. Forti corpore, debili animo, qui et discedere de Societate quaerere se dixit et dum de hac re a R. P. Provinciali expectat responsum, ad communionem non admittitur. Studiis humanioribus vacavit fere duobus annis et concionibus aliquandiu Pragae publicis et hic per 4 menses. Docuit pueros per menses 3. Ingenium mediocre habet, sed inconstans, vagum et curiosum et libertatis amicum.

Blasius [Montanuccio] italus, puto 21 annum attigisse, quia hic iam non adest, et circa 4 annos cum dimidio fuisse in Societate. Bonis corporis viribus, ad externa bene aptus, ad studia minime, quamvis alioqui habet bonum ingenium. Semper fuit in variis officiis occupatus, excepto aliquanto tempore quo studuit. Tentatur facile.

Hieronymus [Landsknecht] helvetius, credo, non attigit 20 annum, bono animo, corpore forti, iuxta aetatem suam. Nondum fuit 2 annos in Societate. Non est studiosus nec, credo, aptus multum. Arte pistoria occupatus fere semper fuit.

Paschalis [Merida] hispanus novitius excessit 20 annum; nondum annum in Societate peregit. Vars officiis occupatus fuit et in culina ultra 3 menses. Mediocribus corporis viribus et bona animi propensione et affectione, modico ingenio et prudentia, tentabilis nimis.

De pragensibus etiam iussus sum a P. D. Paulo [Hoffaeus] scribere; quo circa ut absens pauca dicam.

De doctoribus nihil puto esse dicendum si quidem iam altissima tenuere studia et quid valeant ingenio, promotores perspexerint. D. itaque Henrricus [Blyssemius] corpore nec forti, nec infirmo admodum, indiget bene tractari, animo bono et cupido salutis proximorum, videtur mihi bene prudens ad conversandum et gubernandum, quamvis, credo, non est exercitatus.

M. Balthasar [Sammereier] infirmo corpore, ingenio etiam non nimis apto ad altiora studia, sed animo bono, ad unam scholam videtur sufficere; ad gubernandum nescio, quantum valeat. [36v]

Stephanus [Liberius] grandi et forti corpore, et animo, credo, aptus ad maiora studia et ad gubernandum etiam. Est fere coaetaneus in Societate Floriani, sed credo retinendus adhuc quia aliquando ostendit caput.

De Venceslao [Sturmius] non habeo quid dicam quia parum in his partibus novi eum.

M. Michael [Tolmainer] sclavus iuvenis ad omnia paratus, optimo animo mihi videtur et corpore sano, ingenio non tardo.

M. P. [Vojvodiƒ] sclavus, infirmis pedibus, animo bono, ingenio non multum potest, ad unam classem infimam sufficit.

M. Ludovicus [Backrel] non novi diu.

Andreas [Broch] italus ultra 20 annos, ultra etiam triennium aut circa fuit in Societate; latomus. Semper fuit in humilibus rebus detentus, propter quae aliquoties fuit infirmus animo, sed alias bonus satis.