[1559-08-30 - PRAHA]

[1559-08-30 - PRAHA]

Catalogus personarum collegii Pragensis

30. Augusti 1559

Cathalogus fratrum pragensium 1559 trigesimo augusti

D. Henricus [Blyssemius] - Fuit in Societate per quinque annos. Docuit Pragae sacram theologiam per 4 annos. Fuit concionator Ser.mi Archiducis, quodam etiam casu vice rectoris quando is esset in Oybin. Praefectus studiorum. Vacavit literis quamdiu potest recordari. Ingenio multum pollet. De aetate incertus est. Putat tamen se habere 28 annos, et ego puto quod habeat plures. Propensus est ad iuvandam iuventutem et proximum. Vires corporales exiguas habet: est valetudinarius. Plus valet in viribus spiritualibus, et plus etiam in schola et conversatione quam in aliis.

Balthasar [Sammereier] - Fuit in Societate per quatuor annos et aliquid amplius. Docuit Pragae grammaticam fere quamdiu ibi fuit. Est autem ex primis. Transivit per officia probationis. In Societate vix fuit sub praeceptore. Et antequam in eam veniret, fere nihil scivit. Valet tamen aliquid in praeceptis grammaticis. Ingenio parum valet. Habet 23 annos. Propensionem habet ut sit perpetuus praeceptor puerorum, interdum etiam ut sit minister domus. Ad utrumque videtur aptus, sed non ultra humaniores literas. Est magno corpore et valetudinario plus fere quam D. Henricus. In spiritualibus viribus est potens. Magis aptus ut gerat curam animarum quam ut studeat. [302v]

Wenceslaus [Sturmius] - Fuit in Societate per quatuor annos. Docuit Pragae humaniores literas satis foeliciter, quamvis difficulter propter principium. Transivit per officia probationis. Vacavit literis quamdiu fuit in Societate. Ante cuius ingressum fere nihil scivit. Profecit in rhetoricis et graecis, non ultra. Ingenio egregie valet. Habet 23 annos. Propensus est ad infimam classem, nihil ad conciones in quibus etiam parum valet. Pollet viribus corporalibus, satis etiam spiritualibus; et si quas tentationes passus est propter difficilia principia suarum occupationum hic Pragae, emersit tamen, ut mihi videtur, nisi fallor, et fiunt ei paulatim omnia faciliora. Ex quo eum alioqui novi, semper fuit constans in vocatione. Potentior ad studia quam animarum curam. Idoneus est ad quascumque superiores facultates et forte magis quam ullus alius boëmorum, quos ego in Societate vidi.

Stephanus [Liberius] - Fuit in Societate per quinque annos. Non diu fuit praeceptor classis humanitatis. Transivit per officia domestica. Vacavit literis quamdiu fuit in Societate; antea nihil scivit. Consecutus est mediocrem fructum in rhetoricis. Ingenio mediocriter valet, tamen practico magis quam speculativo. Habet 22 annos. Propensus est ad varia quae occurrunt, quaeque sunt excellentia. Videtur tamen valere in concionando et docendo si studeret utrique. Vires corporis habet bonas, magnus corpore. Spirituales vi-[303r]res habet bonas, estque ac fuit semper constans. Magis aptus ad studia quam curam animarum. Idoneus etiam ad omnes superiores facultates.

M. Ludovicus [Backrel] - Fuit in Societate per unum annum. Nunquam docuit nisi per aliquot menses pueros prima rudimenta. Erit tamen aptior ad docendum quam ad quaevis alia. Transivit per officia probationis. In Societate nihil fere studuit, sed Lovanii creatus est magister, fuitque in ordine promovendorum primus post liniares ut vocant. Ingenium habet philosophicum et medicum satis foelix. Habet 26 annos. Propensus fuit ad Indias quamdiu fuit in Societate. Vires corporales et spirituales habet fortes ad omnia officia Societatis obeunda. Idoneus ad omnes facultates superiores.

Petrus Vojvodiƒ - Fuit in Societate fere per quinque annos. Fere semper fuit in infima classe satis foelix praeceptor. Transivit per omnia officia probationis. Adhuc parum profecit in studiis, nondum est grammaticus. Ingenium parvum. Annos habet 24. Propensus ad studia plus quam ingenium patiatur, quamvis in humanioribus possit proficere propter diligentiam. Vires corporales et spirituales mediocres habet, quae progressu temporis poterunt sufficere ad munus docendi si ingenium adsit, et curandi animas. Idoneus non videtur esse ad facultates artium. Videtur tamen habere nescio quid ingenii philosophici. Forte fieret idoneus etiam ad hoc.

Michael [Tolmainer] - Per duos annos in Societate fuit. [303v] Docuit pueros rudimenta grammaticae fere per annum. Transivir per officia probationis. Studuit in Societate ut principia grammaticae intelligeret. Ingenium habet accommodatum magis ad pietatem quam ad studia. Annos habet 19. Propensus ad officia domestica, maxime ad sacristiam, in qua nunc est. Vires

corporales bonas, meliores spirituales habet, et si difficultas ingenii (quae tamen non videtur ita magna esse atque Petri) sufficeret omnibus officiis Societatis, maxime curis animarum. Non videtur idoneus ad facultates artium, sed tamen diligentia (qua multum in omnibus valet) posset eum promovere ad omnia.

Andreas [Broch] - Fuit in Societate per tres annos. Nunquam docuit. Fuit cocus et est adhuc, emptor etiam et dispensator. Fuit murator. Non studuit diu, novit aliquid latine loqui magis ex consuetudine. Ingenium habet utcumque practicum in agibilibus. Habet 24 annos. Nullam prodidit propensionem, nec ad alia videtur esse utilis quam ad officia domestica obeunda. Fortis in corpore satis ac magis quam in spiritu.

Henricus [Hollants] - Nihil docuit unquam. Semper versatus in officiis domesticis incertis. Nihil scit. Nec ingenium habet. Annos habet circiter 32. Propensionem vix singularem nisi ad ea quae ab obedientia offeruntur. Utcunque fortis in corpore, et mediocritex habet in spiritu. Pro-[304r]pter simplicitatem, quae in illo magna est, non videtur idoneus nisi ad domestica.

Catherinus [Gallus] - Fuit in Societate fere per tres annos. Nihil docuit. Transivit per oficia domestica. Diutius tamen fuit sacristanus. Ad quod tamen officium est parum aptus. Nihil studuit. Loquitur latine ut potest, magis ex consuetudine. Ingenium parvum admodum ad omnia. Habet 17 annos. Propensionem primariam habet ad studia ut discat legere et scribere; secundariam ad sacristiam. Magis fortis in corpore quam spiritu. Vix scio an ad aliud sit idoneus quam ad domestica.

Georgius [Iacobi] - Fuit in Societate per duos annos fere, vota nondum edidit. Nihil docuit. Est pistor. Scit tantum germanice legere et scribere. Ingenium habet tantum pro sua arte et alia officia domestica satis aptum. Habet 26 annos. Propensus ad panes coquendos. Sat fortis in utroque homine et valde devotus.

Iacobus [Voltelin] - Fuit in Societate per duos menses. Nihil docuit. Est murator. Nondum transiit per omnia officia domestica. Scit legere italice et latine et scribere mediocriter. Ingenium tantum habet pro sua arte et rebus domesticis utcunque bonum, sed simplex. Habet annos circiter 25. [304v] Habeo, inquit, propensionem ad coquinam ut vincam propensionem quam habebam ad studia. Sat fortis in utroque homine, sed pro studiis non est.

Paulus Hoffaeus - Hic fuit in Societate per quinque annos. Fuit minister Romae, sacristanus Patavii, confessionarius, concionator, et lector theologiae per medium annum Viennae. Rector et lector Titelmanni Dialectices Pragae. Sed nondum transivit per oficia probationis ut alii fratres Societatis solent. Studuit fere per totam vitam. Habet ingenium perplexum, humile et obscurum. Quot annos habeat, ignorat. Forte 28 plus minus; al suspicantur eum habere 30 aut 32. Habet propensionem ad casus conscientiae ut sit confessarius Romae, et ut vacet rebus spiritualibus, maxime propriis Societati; nimirum ut congreget et in quendam ordinem a patribus datum redigat mores, consuetudines, exempla spiritualia, consilia et modos gubernandi, et quicquid boni potest inveniri a quocunque tandem id divinitus actum sit in sancta Societate nostra; et in hoc vitam consumat ad utilitatem propriam et omnium, et maiorem Dei gloriam. Ad haec sentit se fortem in utroque homine, et tentatum nunquam contra Societatem, ne leviter quidem, conservatus ab eo qui eum ad hanc vocavit, cui aeterna gloria. Amen.