[1560-11-?? – PRAHA]

Catalogus personarum collegii Pragensis

Mense novembri 1560

Catalogus fratrum pragensium pro mense novembri anni 1560

M. Hurtadus [Pérez] est minister, legit graeca in scholis, domi vero fratribus. Est mediocriter sanus.

Doctor Henricus [Blyssemius] est praefectus scholae, carcerum, hospitalium (non ut teneatur ire, sed mittere et instruere eos quibus eundum est), disputationum, studiorum fratrum et concionum ipsorum. Consiliarius, syndicus, confessarius collegii novi et concionator Archiducis. Est sanus modo.

M. Balthasar [Sammereier] est praefectus collegii novi, chori, confitentium boëmice. Domi audit logicam et aethicam. Legit iunioribus fratribus grammaticam Despauterii, in scholis vero graecam et doctrinam christianam. Est contentus et sanus.

M. Stephanus [Liberius] legit syntaxim et Officia in scholis. Concionatur in templo nostro ac legit ibidem doctrinam christianam. Est bonus, contentus et sanus.

M. Ludovicus [Backrel] est sub praefecto collegii novi et praeceptor rhetoricae classis; in qua profitetur tantum Partitiones (quas etiam domi legit) et orationem pro Murena. Est bonus et sanus.

M. Robertus [Gyrulius] legit Iustinum et Virgilium. Domi audit rhetoricam et graeca seque exercet in componendo. Est bonus et sanus.

M. Michael [Tolmainer] est praeceptor classis maioris grammaticae et sacristanus, quia non sit alius aptior et cui hoc committi possit. Componit ac domi graeca audit. Est valde bonus et sanus. [307v]

M. Petrus [Vojvodiƒ] est praeceptor infimae classis, domi audit graeca et coinponit latina. Est bonus satis. Patitur ab aliquot annis dolorem pedum.

Casparus Meringer germanus, novitius, est praeceptor classis minoris grammaticae. Domi audit rhetoricam et graeca et exercetur suo tempore in humilioribus. Est bonus et sanus ac bonae spei.

Blasius [Montanuccio] est cocus et dispensator. Bonus sed non satis sanus.

Anthonius est ianitor et sartor, bonus ac sanus.

Ioannes Stromayer est discipulus tantum in classe humaniori, quemadmodum etiam Alexander [Voit] quorum uterque domi exercetur in Despauterio et humilioribus officiis. Hic est bonus, ille quoque talis esse cupit, sanus vero uterque.

Iacobus [Voltelin] est faber et murator, utilis ad multa, bonus et sanus.

Solus M. Ludovicus [Backrel] aptus est ad sacerdotium. De quo statuat tandem V. R. quae iudicaverit esse ad maiorem Dei gloriam.

Omnes apti sunt ad studia maiora excepto M. Petro [Vojvodiƒ] qui est difficilis ingenii et satis erit ut tantum discat ut confessionem audire possit; et Blasio [Monatanuccio] et Iacobo [Voltelin]. M. Balthasar [Sammereier] quoque non ita foelicis est ingenii quamvis de hoc collegio et tota schola optime sit meritus. Non videtur progressurus ultra statum coadiutorum spiritualium, nisi ex gratia amplius promoveri debeat. [308r]

Praecipua hoc tempore gravamina nostra sunt quod proprium emptorem non habeamus, nam Georgius [Iacobi] pistor vix sufficit collegio novo; quod patiamur coeli iniurias, sed hac hyeme habenda erit patientia; et quod fenestrae vicinorum vel potius homines in fenestris aestate multo magis quam hyeme nobis sunt molesti, quamvis Primati conquesti simus. Deo laus.