[1562-12-?? – PRAHA]

Catalogus personarum collegii Pragensis

mense Decembri anni 1562

Cathalogus patrum et fratrum pragensium, primum officia, deinde dona vel infirmitates corporis, tum dotes vel hebetudines animi, tum denique profectum vel defectum spiritus continens

1. D. Wolffgangi [Georgii] boëmi, qui est annorum 28, in Societate et votis 7 annis. Matrem habet.

1. Officia: 1. professor s. theologiae quando legitur. – 2. Confessarius quorumdam fratrum ac bohemorum. – 3. Consiliarius rectoris. – 4. Minister collegii.

2. Infirmitates corporis: 1. Patitur frequentes catarros capitis. – 2. Non potest contentus esse communi cibo. – 3. Non videtur esse robusto corpore, licet non aegrotet. – 4. Habet vocem satis debilem ad concionandum.

3. Dotes et hebetudines animi: 1. Facile turbatur et impetuose loquitur. – 2. Videtur in rebus sacris mediocriter versatus. – 3. Sermonem non satis congruum habet. – 4. In studiis philosophicis utcumque versatus videtur.

4. Profectus et defectus spiritus: 1. De Societate ac maioribus nostris bene sentit et loquitur. – 2. Magnum habet zelum ut cultus Dei magnifice procedat. – 3. Poenitentias nunquam petit. Duriter alios reprehendit. – 4. Suas tentationes nonunquam quibusdam fratribus vel etiam amicis aperit. – 5. Cum amicis aliquando loquitur et tractat sine rectoris scitu. – 6. Consuetudines nostri collegii approbatas aliquando reprehendit. – 7. Multi illius conversatione saepe tentantur, ut velint hinc abesse. – 8. Passus est aliquando insidias ab amicis circa vocationem, nec satis strenue se gessit.

2. P. Ioannis Magni [Gross] germani, qui est annorum 28, in Societate 7, in votis 5 annis, patrimonium non habet.

1. Officia: 1. Confessarius quorumdam studiosorum et extraneorum. – 2. Lector catechismi germani in templo. – 3. Auditor s. theologiae, quando legitur.

2. Dona et infirmitates corporis: 1. Laborat linguae defectu ut nesciat bene legere. – 2. Laborat oculorum vitio, ut cogatur uti perspicillo. – 3. Est in agendo valde tardus. – 4. Est robusto et sano corpore.

3. Hebetudines animi: 1. Singulares habere dotes non videtur. – 2. Utcumque versatus est in controversiis, ut possit tuto concionari. – 3. Mediocrem experientiam habet rei familiaris. – 4. Ad docendam vel regendam iuventutem ineptus. ─

4. Defectus spiritus: 1. Instabilis est, nec animum firmum habet perseverandi in vocatione. – 2. Invitus et negligenter exequitur officia Societatis. – 3. Hic multis iam probatis mediis, iuvari non potest. – 4. Poenituit eum nonnunquam etiam sacri ordinis. [2v]

3. P. Balthasari [Sammereier] bavari, qui est annorum 25, in Societate per 7 annos, patrem habet.

1. Officia: 1. Professor linguae graecae. – 2. Auditor philosophiae et hebraicae linguae. – 3. Solicitator fratrum, ut carceres et hospitalia visitent. – 4. Instructor pauperum, quando supplicationes vel eleemosynas petunt.

2. Dona et infirmitates corporis: 1. Est propensus ad phthisin. – 2. Habet pectus non satis firmum. – 3. Reliquo corpore videtur esse satis robustus. – 4. Egregiam corporis habet formam et praesentiam.

3. Dotes et hebetudines animi: 1. Ingenium habet durum et laboriosum. – 2. Nimio flagrat studendi desiderio. – 3. Proficit in graecis et hebraicis utcumque. – 4. In sacris valde rudis, ad philosophiam ineptus.

4. Profectus et defectus spiritus: 1. Aliquando fluctuavit, sed nunc in vocatione constantior videtur. – 2. Conversationem nimis familiarem ac levem habet. – 3. De studiis plerumque loquitur etiam in recreatione. – 4. Est devotus et obediens, quando suaviter tractatur.

4. P. Michaelis Tolmaier germani, qui est annorum 24, in Societate per 6, in votis per 5 annos, de patrimonio eius non constat.

1. Officia: 1. Concionator germanus ad S. Iacobum. – 2. Studiosus philosophiae. – 3. Praefectus novitiorum. – 4. Praefectus templi.

2. Dona vel infirmitates corporis: 1. Est robusto corpore, sed brevi statura. – 2. Laboriose concionatur ob vocis defectum.

3. Dotes animi: 1. Habet ingenium mediocre. – 2. Habet optimam memoriam. – 3. Valet in graecis ac poësi mediocriter.

4. Profectus spiritus: 1. Est fidelis obedientiae filius. – 2. Est in vocatione solidissimus et magnae aedificationis. – 3. Est sacris ac piis rebus addictus.

5. M. Ioannis [Labrai] bohemi, qui est annorum 22, in Societate per 7, in votis per 6 annos, patrimonium illius incertum est.

1. Officium: Est lector unius philosophicae lectionis.

2. Infirmitates corporis: Phthisi nondum liberatus est omnino.

3. Dotes animi: 1. In philosophia bene versatus videtur. Placet auditoribus. – 2. In poesi mediocriter valet. – 3. Videtur habere mediocre iudicium.

4. Profectus et defectus spiritus: 1. In vocatione solidus videtur. – 2. Impatiens nonunquam et sui capitis. – 3. Non satis circumspecte semper loquitur.

6. M. Roberti [Gyrulii] leodiensis qui est annorum 25, in Societate per 5, in votis per 3 annos, non habet patrimonium.

1. Officia: 1. Professor rhetoricae. – 2. Praefectus sanitatis. – 3. Solicitator fratrum ut scribant ad collegia.

2. Infirmitas corporis: Non habet sanos oculos et est ruptus.

3. Dotes animi: Est ingeniosus, prudens, proficit in graecis, aptus ad philosophica.

4. Profectus et defectus spiritus: 1. Est pertinax in propriis opinionibus. – 2. In vocatione solidus, licet facile tentetur, sed proficit in dies. [3r]

7. M. Petri [Hugo] hollandi, qui est annorum 23, in Societate 6, in votis 4 annis, matrem habet.

1. Officium: Professor hebraicae linguae et Virgilii.

2. Donum corporis: Est sanus, at non valde robustus.

3. Hebetudo et dotes animi: 1. Est tardus et frigidus in docendo. – 2. Est taciturnus et pacificus. – 3. Excellit in graecis et proficit in hebraicis.

4. Profectus et defectus spiritus: 1. In vocatione aliquando fluctuavit, sed iam solidior est. – 2. In communi recreatione melancholicus, nisi excitetur. – 3. Vestibus incompositus et moribus ineptus ad conversandum.

8. M. Wolfgangi [Maria Gingalius] bohemi, qui est annorum 25, in Societate ultra 7 annos, in votis 4 annis.

1. Officia: 1. Lector syntaxis. – 2. Praefectus collegii novi.

2. Infirmitates corporis: 1. Morbi caduci reliquias quasdam, sed raro sentit. – 2. Est valetudinarius.

3. Hebetudines animi: 1. Non loquitur eleganter, sed aliquando etiam incongrue. – 2. Non videtur ad altiora studia aptus. – 3. Docet satis frigide et leniter regit.

4. Profectus spiritus: 1. In vocatione solidus est. – 2. Potius per simplicitatem, quam per malitiam aliquando labitur.

9. Urbani Frentzel germani, qui est annorum 26, in Societate per 6, in votis per 5 annos, patrimonium habet parvum quod offert Societati.

1. Officia: 1. Praeceptor infimae classis. – 2. Coadiutor in domesticis officiis.

2. Infirmitas corporis: Est debilis et patitur frequenter infirmitates.

3. Hebetudo animi: Non habet ingenium ad litteras altiores.

4. Profectus et defectus spiritus: 1. Est in vocatione utcumque solidus. – 2. Est valde querulosus et nimis solicitus pro corpore. – 3. Nisi stimuletur, est tardus et immundus. – 4. Non esset illi soli fidendum apud extraneos.

10. Iacobi Seckleri germani, qui est annorum 24, in Societate per 7, in votis per 5 annos, patrimonium obtulit Societati.

1. Officia: 1. Studiosus grammaticae. – 2. Solicitator negotiorum collegii quando necessitas urget.

2. Infirmitas corporis: Est ruptus, licet sanam complexionem habeat.

3. Hebetudo et dos animi: 1. Habet ingenium tardum et hebes ad litteras. – 2. Valet experientia multarum rerum.

4. Profectus spiritus: 1. Est in vocatione solidismus, devotus et pius. – 2. Est pertinax aliquando in suis opinionibus.

11. Thomae [Budina] schlavi, qui est annorum 20, in Societate per annum, in votis per mensem, habet patrimonium forte exiguum.

1. Officia: 1. Est auditor humaniorum litterarum. – 2. Observat quae desunt patribus ac fratribus.

2. Dotes animi: Callet multas linguas, videlicet latinam, italicam, germanicam, bohemicam, hungaricam, schlavonicam.

3. Donum corporis: Est robusto corpore.

4. Profectus spiritus: 1. In vocatione solidus. – 2. In Studiis diligens. – 3. Contra praeceptorem in disputando pertinax. [3v]

12. Bartholomaei [Viller] leodiensis qui est annorum forte 24, in Societate 4, in votis unus, parentes habet.

1. Officia: 1. Est Syndicus rectoris. – 2. Est auditor philosophiae.

2. Donum corporis: Est sanus et robustus.

3. Dotes animi: 1. Videtur bonum ingenium et iudicium habere. – 2. In rhetoricis, graecis, poësi et philosophicis mediocriter versatus.

4. Profectus spiritus: 1. Zelosus in concionibus. – 2. Est scrupulosus circa se et alios. – 3. Modestus, pacificus, in vocatione solidus, devotus, obediens. – 4. Est fidelis et secretus.

13. Bartholomaei [Weisagii] glatzensis germani, qui est annorum 20, in Societate per 9, in votis per 1 mensem, habet parentes.

1. Officia: 1. Est auditor philosophiae. – 2. Est visitator cubiculorum orationis tempore.

2. Dona et Infirmitates corporis: 1. In sermone tardus utcumque. – 2. Oculos ita debiles habet, ut vix ad lumen possit legere. – 3. Est alioquin sanus et utcumque robustus.

3. Dotes animi: 1. Valet carmine mediocriter. – 2. In philosophia et lingua hebraica proficit mediocriter. – 3. Habet ingenium mediocre, sed est simplex.

4. Profectus spiritus: 1. In vocatione solidus est. – 2. Libenter loquitur et tractat de rebus piis. – 3. Diligenter praestat obedientiam.

14. Alexandri [Voit] pragensis, qui est annorum 17, in Societate ultra 2 annos, in votis ultra annum et medium. Habet matrem pauperem.

1. Officia: 1. Est auditor rhetoricae. – 2. Est superior sacristanus. – 3. Est solicitator fratrum, ut se recreent suo tempore.

2. Donum corporis: Est sanus, at non valde robustus.

3. Dotes animi: 1. Est ingeniosus et solers in agibilibus praesertim. – 2. Est practicus in rebus multis.

4. Profectus spiritus: 1. Est devotus et pius. – 2. Est solidus in vocatione. – 3. Est modestus et pacificus.

15. Ioannis [Milleitner] viennensis, qui est annorum 19, in Societate et votis 3 annis. De patrimonio nihil constat.

1. Officium: Auditor philosophiae.

2. Infirmitas corporis: Est gibbosus, scabiosus ac debilis.

3. Dotes animi: 1. Habet ingenium mediocre. – 2. Habet quandam gratiam concionandi, licet vox sit ingrata.

4. Defectus spiritus: 1. Est sordidus et immundus quando non cogitur ad munditiem. – 2. Non facile credit superioribus in omnibus. – 3. Agitatur diversis subinde desidersiis. – 4. In vocatione fluctuat quando agitur cum ipso serio.

16. Matthaeus [Zörer] pataviensis qui est annorum 22, in Societate per annum, in votis per 2 menses. Patrimonium non habet.

1. Officia: 1. Auditor rhetoricae; scriptor latinarum rerum, quando est opus. – 2. Custos candelarum.

2. Donum corporis: Est sano sed exili corpore.

3. Dotes animi: Habet ingenium mediocre, et valet carmine et prosa mediocriter.

4. Profectus spiritus: Solidus est in vocatione, obediens, devotus. [4r]

17. Nicolai Salii pragensis, qui est 18 annorum, habet parentes vivos, fuit in votis per mensem.

1. Officium: Est auditor philosophiae.

2. Donum corporis: Habet sanum et robustum corpus sed exiguae staturae.

3. Dotes animi: 1. Est ingeniosus et valet carmine et prosa mediocriter. – 2. Est aptus ad concionandum.

4. Profectus spiritus: 1. In vocatione constans, devotus et obediens. – 2. Patitur tentationes frequentes contra fidem.

18. Valentini [Kampel] germani et bohemi, qui est annorum 20, in Societate fere per annum, in votis per mensem. Habet parentes.

1. Officia: 1. Auditor rhetoricae. – 2. Praefectus cantus. – 3. Scriptor rerum latinarum et germanarum, quando est opus.

2. Donum corporis: Habet sanum corpus.

3. Dotes animi: 1. Habet ingenium mediocre. – 2. Est agilis, solers, aptus ad multa.

4. Profectus et defectus spiritus: 1. Est constans in vocatione – 2. Est devotus, sed obliviosus circa obedientiam. – 3. Vexatur frequenter gulae vitio.

19. Matthiae Hasler germani et bohemi, qui est forte 18 annorum, in Societate per 6, in votis per 1 mensem. Habet matrem.

1. Officium: Est auditor humaniorum litterarum.

2. Donum corporis: Non est omnino robusto corpore.

3. Dos animi: Est ingeniosus et simplex.

4. Profectus spiritus: In vocatione constans, pius et obediens.

20. Bartholomaei Molitoris budicinensis qui est forte 20 annorum, in Societate ultra 2 annos, in votis per 2 menses.

1. Officia: 1. Auditor humanioris literaturae. – 2. Subit officia diversa domi cum est opus.

2. Dotes animi: Habet ingenium mediocre, sed est diligens.

3. Donum corporis: Est sano, at non omnino robusto corpore.

4. Profectus spiritus: In vocatione constans, simplex, obediens, devotus.

21. Iacobi [Reller] augustani qui est annorum 19, in Societate per 2, in votis per 1 mensem. Habet matrem.

1. Officium: Studiosus humaniorum litterarum.

2. Donum corporis: Habet sanum corpus.

3. Dos animi: Ingenium habet mediocre.

4. Profectus spiritus: Est constans in vocatione obediens, paratus ad omnia.

22. Blasii [Montanuccio] itali coadiutoris temporalis, qui est annorum 21, in Societate 7 et in votis ultra 6 annos.

1. Officia: 1. Est ianitor collegii. – 2. Est superior hortulanus. – 3. Habet curam lavandorum capitum.

2. Infirmitas corporis: Est valetudinarius.

3. Dos animi: Habet praxim mediocrem circa sanitatem.

4. Profectus et defectus spiritus: 1. Est solidus in vocatione. – 2. Difficulter cum omnibus potest convenire propter morositatem suam. – 3. Est liber et nonnunquam rusticus in verbis. – 4. Est devotus.

23. Iacobi [Voltelin] itali coadiutoris temporalis qui est annorum 27, in Societate ultra 3 annos, in votis per 2 menses. Habet patrem.

1. Officium: Est faber lignarius et murarius.

2. Donum corporis: Habet sanum et robustum corpus.

3. Dos animi: Habet praxim, sed discursum animi tardum.

4. Profectus et defectus spiritus: 1. Est constants in vocatione, devotus. – 2. Facile tentatur et impatiens efficitur. – 3. Fuit semel a votis liberatus ob desiderium carthusianae religionis, sed reversus ad nos et ultra annum rursus probatus, ad vota denuo (quod vehementissime urgeret) admissus est. [4v]

24. Sampsonis [Leb] viennensis novitii qui est annorum 18.

1. Officia: 1. Coadiutor temporalis in diversis oficiis. 2. Scriba bonus rerum germanicarum.

2. Donum corporis: Est sano et robusto corpore.

3. Dos animi: Habet quandam praxim rerum aulicarum.

4. Profectus spiritus: 1. Est Simplex et pietati deditus. – 2. Paratus ad omnia, obediens, sed somnolentus.

25. Petri [Clement] germani coadiutoris temporalis, qui est annorum 23, in Societate per 2 annos, in votis per mensem. Patrimonium habet qualecunque.

1. Officium: Est oeconomus collegii et superior coquus.

2. Donum corporis: Est sano et robusto corpore.

3. Dos animi: Habet praxim mediocrem.

4. Profectus spiritus: Constans in vocatione, humilis, obediens, devotus.

26. Ulrici [Diem] germani coadiutoris temporalis, qui est annorum 21, in Societate per 9, in votis per 1 mensem. Patrimonium illius incertum.

1. Officia: 1. Est sacristanus. – 2. Est custos pannorum.

2. Donum corporis: Est omnino sanus et robustus.

3. Dos animi: Est simplex et sincerus.

4. Profectus spiritus: In vocatione constans, obediens, devotus.

27. Michaelis [Neuman] germani coadiutoris, qui est annorum 19, novitius.

1. Officium: Sartor collegii.

2. Donum corporis: Utcumque robustus et sanus.

3. Dos animi: Simplex et sincerus.

4. Profectus spiritus: In vocatione constans, devotus, obediens.

28. Nicolai bohemi novit coadiutoris, qui est annorum 19.

1. Officium: Coquus inferior.

2. Donum corporis: Sanus et robustus.

3. Hebetudo animi: In litteris nihil scit.

4. Profectus spiritus: Mediocriter se gerit.

29. Henrici Blyssemii

1. Officia: 1. rector collegii indignissimus. – 2. Concionator ineptus. – 3. Confessarius quorumdam fratrum et extraneorum.

2. Donum corporis: Corpore paulo melius valet quam solebat.

3. Hebetudo animi: Ingenium ut constat, obtusissimum habet.

4. Defectus spiritus: Defectibus ac miseriis plenus est ut potest ex aliis rectius cognosci.

Haec omnia simpliciter ac sincere scripta sunt in Domino, cui honor et gloria in secula seculorum. Amen.