[1567-08-25 - OLOMOUC]

Catalogus personarum collegii Olomucensis

25 augusti 1567

Catalogus informationis patrum et fratrum collegii olomucensis Societatis Iesu

factus die 25 augusti anno 1567

1. P. Hurtadus Perez hispanus ex dioecesi cartaginensi, Mulae, honestis civibus ex suis praediis viventibus natus (uterque iam obiit), rector. Ingressus est Societatem Compluti anno 1553 initio mensis iulii. Vota primo fecit in die Assumptionis B. Virginis eiusdem anni. Est fere quadragenarius et scholasticus approbatus et magister in artibus. Novit latine, graece, hispanice, italice et aliquid germanice.

2. P. Andreas Piessynus ex Tina boemus, dioecesis pragensis, doctor in theologia, praefectus seminarii et professor graecae lectionis et catechista ordinarius scholae collegii. Extraordinarie aliquando concionatur boemice. Ingressus est Romae Societatem circa festum trium regum anno 1556, quo tempore etiam primo fecit vota simplicia. Parentes vivunt et sunt molitores. Est annorum 35. Novit latine, graece, boemice, hebraice, italice.

3. P. Stephanus Rimelius svevus ex Hohendinga, dioecesis constantiensis. Factus fuit sacerdos hoc anno. Concionator ordinarius in templo parochiali B. Virginis Mariae, et praefectus studiorum. Ingressus est Societatem Viennae anno 1562 circa Pascha, et vovit primo sub initium anni 64. Cursum philosophiae imperfecte audivit, theologiae nihil. Habuit parentes mercatores. Mater vivit. Fratrem habuit et sororem; ambos religiosos. Est annorum 29, et novit latine et germanice.

4. Bartholomeus Weysagius germanus ex Glaz, dioecesis pragensis, prophessor humanitatis et poeta. Ingressus est Societatem Pragae die 14 martii anno 1562; quo anno primo vovit in die S. Catherinae [25 nov.]. Parentem habuit vitriarium. Est praefectus bibliothecae collegii. Est annorum 27. Novit latine et germanice.

5. M. Melchior Pichler tirolensis ex Sterzinga, dioecesis brixinensis, magister in artibus Pragae promotus. Est magister primae classis grammatices, et concionator pomeridianus diebus dominicis in templo B. Virginis. Ingressus est Societatem Ingolstadii in die apostolorum Petri et Pauli [29 iun.] anno 1563, et eodem anno primo vovit in festo praesentationis B. Virginis [21 nov.]. Est diaconus factus superiore Quadragesima. Parens fuit hospes et consul suae civitatis. Est annorum 25. Novit latine et germanice.

6. Gasparus Winclerus austriacus viennensis, magister secundae classis grammaticae. Audivit cursum artium Viennae. Ibique ad Societatem venit anno 1561 in festo S. Catherinae [25 nov.] et vovit primo anno 63 circa festum Paschatis. Pater fuit chyrurgus. Erit annorum 21. Novit latine et germanice. [27v]

7. Benedictus Gallus sclavus ex Haylenstain, dioecesis tergestinae [Trieste] socius P. Andreae in seminario, auditor humanitatis. Venit ad Societatem Viennae die 15 ianuarii anno 1562. Vovit primo die 8 aprilis 63. Pater fuit sartor et agricola. Est annorum 23. Novit latine, germanice et sclavonice.

8. Christophorus Cramel bavarus ex Dingelfinga, dioecesis pataviensis, praeceptor infimae scholae. Venit ad Societatem Viennae primo die Quadragesimae anno 1562, et primo vovit post biennium ab ingressu. Fuit parens sartor. Est annorum 25. Novit germanice et latine.

9. Leopoldus Caesar austriacus ex Wattoffen [Waidhofen] diocesis viennensis, auditor humanitatis. Venit ad Societatem Viennae die 12 septembris anno 1563. Vovit primo in Nativitate Christi anno 64. Habuit parentes cervisiarios, quibus fuit unigenitus. Est annorum 20. Novit latine et germanice.

10. Bartholomeus Molitor lusatianus ex Vidihenauen, dioecesis pragensis, ianitor, credentiarius et custos pannorum. Venit ad Societatem Pragae circa festum S. Iacobi [25 iul.] anno 1561. Vovit primo in festo S. Catherinae [25 nov.] 63. Est annorum 25. Novit latine, germanice et aliquid boemice.

11. Christophorus Hayder silesius ex Ligeniz, dioecesis wratislaviensis, sartor. Venit ad Societatem Viennae die 16 ianuarii anno 1566. Vovit primo Olomucii in festo S. Bartholomei [24 aug.] 67. Parens fuit venditor cervisiae. Est annorum 19. Novit germanice.

12. Paulus Bauzek bohemus ex Parduwiz, dioecesis pragensis. Venit ad Societatem Viennae circa principium ianuarii anno 1567. Nondum habet vota. Admissus est pro coadiutore temporali. Iam coquus est. Parentes sunt mercatores panni et vini. Est annorum 19. Novit germanice, boemice et aliquid latine.