[1574-02-11 - OLOMOUC]

Catalogus personarum collegii Olomucensis

11. Februarii 1574

Catalogus collegii olomucensis de Societate Iesu factus 11 februarii 1574

1. P. Hurtadus Perez rector, hispanus ex Mula, dioecesis carthaginensis, 47 annorum, parentibus Didaco Martinez de Exea et Agnese Hurtado, venit ad Societatem Compluti circa quartum diem iulii 1553 et vovit ibidem eodem anno in Assumptione B. Virginis [15 aug.] Fecit professionem Viennae coram P. Provinciale in dominica infra octavam Ascensionis Domini [30 maii] anno 68. Compluti factus est baccalaureus in artibus paulo ante ingressum in Societatem, et Romae magister anno 55. Confirmatus fuit in patria. Tonsuram et 4 minores accepit a proprio episcopo in sabbato sancto Murciae circa annum 48; reliquos sacros ordines Romae in sabbato sancto et infra octavam Resurrectionis anno 56 ab episcopo Bo...

2. P. D. Christophorus Strobelius bavarus ex Ratepuch dioecesis ... , patre Strobelio et Anna, 38 annorum, venit ad Societatem anno 55 in prima vel 2 hebdomada Quadragesimae. Fecit vota primum eodem anno 11 aprilis, et professionem Viennae anno 68 in die 8 Resurrectionis Domini [18 apr.]. Confirmatus fuit Ingolstadii adhuc externus ab ekstatensi Episcopo. Tonsuram et minores ordines accepit Romae et etiam sacros anno 63 in aestate; et factus est ibidem doctor theologiae eodem anno, Viennae vero anno 67 scholasticus approbatus. Loquitur latine, germanice, italice et aliquid lusitanice. Potest docere theologiam, concionari et gubernare. Est praefectus seminarii, confessarius collegii et examinator petentium ingredi ad Societatem et consultor.

3. P. Wolfgangus Maria Gyngalius boemus ex Thina, dioecesis pragensis, patre Wolfgango et matre Anna, annorum 38, venit ad Societatem Romae in augusto anno 55. Fecit vota post annum ab ingressu. Adhuc [153v] externus fuit confirmatus et accepit tonsuram et minores ab episcopo labacensi Augustae anno 55 antequam ivit Romam. Sacros ordines accepit omnes ab archiepiscopo Pragae anno 63. Fuit factus magister in artibus a P. D. Madridio et Emanuele anno 61. Audivit circa medium annum theologiam. Est minister collegii, concionator extraordinarius boemicus ubi opus est, et templi praefectus, ac confessarius ordinarius boemice. Est valetudinarius ex capite aliquando et calculo saepius. Novit latine, boemice et italice; consultor.

4. P. Wolfgangus Pyringer austriacus, ex Lambaco, 38 annorum, patre Sigismundo Swaiger, matre vero Magdalena, dioecesis passaviensis, venit ad Societatem Viennae anno 55 in die S. Agathae [5 febr.]. Ibidem vovit primum in die S. Michaelis [29 sept.] anni sequentis. Confirmatus est et accepit tonsuram, minores et sacros ordines Viennae diversis temporibus et a diversis episcopis, scilicet a nitriensi et gurzcensi et ab eo qui nunc est pragensis; sacerdos vero factus est anno 61 in Quadragesima. Factus est magister in artibus a P. Natali anno 63. Audivit etiam aliquid theologiae, et eodem anno ab eodem scholasticus approbatus est. Est etiam praefectus studiorum, confessarius germanicus ordinarius et concionator extra ordinem ubi opus est, praefectus etiam chori. Potest docere in omnibus usque ad theologiam. Est bonus poeta et graecus. Lingua tantum vulgari germanica utitur. Est consultor et admonitor rectoris et catechista in maioribus scholis.

5. P. Ioannes Merquitius saxo ex Delitsch, dioecesis hallensis, 35 annorum, patre Ambrosio Merquitio, matre Anna, venit ad Societatem Pragae anno 57 in augusto vel initio septembris. Vota fecit Romae post annum ab ingressu, ubi audito cursu artium, factus est magister; et audivit 3 annos theologiam. Confirmatus fuerat adhuc foris ab episcopo mespurgensi. Tonsuram et ordines tam minores quam sacros [154r] ab episcopo mirandulano Romae, minores quidem antea, subdiaconatum 4 temporibus decembris anno 64, diaconatum 4 temporibus Quadragesimae anno 65, sacerdotium sabbato ante dominicam Passionis [8 apr.] eiusdem [anni]. Hic est concionator ordinarius germanicus in templo B. Virginis prope nostrum collegium, audit confessiones, potest etiam docere. Loquitur latine, germanice et italice; consultor.

6. P. Petrus Ederus, austriacus ex Riet, dioecesis viennensis, 31 annorum, patre Georgio Edero, matre Sybilla, venit ad Societatem Viennae anno 61 sabbato primo Quadragesimae [21 febr.]. Fecit vota primum ibidem post biennium in festo apostolorum Petri et Pauli [29 iun.]. Confirmatus adhuc externus in templo nostro ab archiepiscopo strigoniensi, Olaho. Tonsuram accepit a gurcensi, iam Societatis, minores Tirnaviae et aliquanto post subdiaconatum a suffraganeo strigoniensi, episcopo scopiensi in festo apostolorum Petri et Pauli [29 iun.] anno 66; diaconatum in festo S. Catharinae [25 nov.] et sacerdotium in prima dominica Adventus [29 nov.] 73 Cremsirii a Ioanne episcopo olomucensi. Scholasticus approbatus factus fuit a P. Provinciali Viennae anno 67. Regit classem principiorum et bene. Aliquando concionatur extraordinarie. Audivit cursum.

7. P. Iacobus Bosgroveus anglus ex Bintonia dioecesis Velliae, 26 annorum, patre Leonardo Bosgroveo, matre Ioanna Arundella, venit ad Societatem Romae anno 65, et vovit sequenti anno circa Epiphaniam. Ibidem accepit tonsuram et minores, Cremsirii vero ab episcopo olomucensi D. Ioanni anno 73, accepit in die S. Catharinae [25 nov.] subdiaconatum, in die S. Andreae [30 nov.] sacerdotium. Scholasticus approbatus factus est Romae. Hic legit graecam lectionem et dialecticam. Vulgarem linguam nescit praeter suam et italicam.

8. Michael Polt viennensis patria et dioecesis, 27 annorum, patre Christophoro Polt [154v] et matre Barbara de Strasburg, venit ad Societatem Viennae anno 61 postridie S. Catharinae [26 nov.]. Fecit vota primum in hebdomada sancta anno 63. Factus scholasticus approbatus a P. Provinciali 25 aprilis anno 68. Fuit confirmatus adhuc externus a nitriensi episcopo in templo nostro, et tonsuram etiam ab episcopo viennensi qui nunc est pragensis. Minores accepit ab episcopo modrucensi iam in Societate. Docet rhetoricam. Est praefectus bibliothecae. Novit aliquid graecae et posset legere in cursu quem audivit, sed non est promotus. Ultra nil audivit. Habet gratiam concionandi, et concionatur cum aliis per vices in templo S. Bernardini. Loquitur latine, germanice, et intelligit et loquitur aliquid italice.

9. M. Paulus Schodaeus flander ex Rotornaco patre Nicolao Schodaeo et Maria Fandendris, 24 annorum, ex dioecesi mechliniensi, venit ad Societatem in patria anno 66 circa Pascha. Fecit vota primum completo biennio et tunc factus est scholasticus approbatus a P. Costero provinciali. Audivit cursum per biennium Lovanii, in quo postea factus est Coloniae baccalaureus, licentiatus et magister anno 73. Viennae autem eodem anno mense augusto accepit 4 minores a nuntio apostolico D. Delphino. Aldernaci autem circa patriam confirmatus erat et acceperat tonsuram ab episcopo cameracensi cuius dioecesis tum erat Romnacum, iam est mechliniensis. Docet humanitatem et graecam lectionem hic in collegio et in seminario est veluti exactor studiorum illorum.

10. Marcus [Pita...iƒ] ziziensis ex Zizia sclavus, dioecesis zagraviensis, patre Emerico Pitaczich, matre Elizabetha, 27 annorum, venit ad Societatem Viennae anno 66 mense augusto. Fuit confirmatus ab episcopo iauriensi antequam fuit Societatis. Fecit vota primum in Assumptione B. Mariae Virginis [15 aug.] anno 68. Accepit tonsuram et 4 minores [155r] Pragae ab archiepiscopo cum aliis fratribus, anno 68; et eodem anno in Purificatione [2 febr.] factus est scholasticus approbatus a P. Provinciali. Docet humanitatem cum alio superiore ad tempus, et est in seminario. Etiam novit aliquid graece. Cursum nondum audivit. Loquitur praeter propriam linguam et latinam aliquid bohemice.

11. Mauritius Duskius prutenus ex Allenstein, dioecesis varmiensis, patre Martino Duskio et matre Barbara, 24 annorum, venit ad Societatem Viennae circa initium iunii 68. Fecit ibidem vota primum in Epiphania [6 ian.] 69. Fuit in patria confirmatus a cardinale Commendono. Accepit tonsuram et minores simul ab archiepiscopo pragensi circa festum S. Iacobi [25 iul.] anno 68. Postea factus est scholasticus approbatus anno 70 in Paschate. Hic docet syntaxin.

12. Lucas Perger ex Tiferia scalvus, episcopatus labacensis, 28 annorum, patre Leonardo Perger, matre Marina, venit ad Societatem Viennae anno 66 in die S. Laurentii [10 aug.]. Fecit vota eodem anno in nativitate Domini. Pragae fuit ab archiepiscopo confirmatus. Cepit tonsuram et 4 minores simul anno 67 in aestate Olomutii. Factus est scholasticus approbatus anno 68 die 10 octobris ex commissione P. Henrici viceprovincialis a P. Balthassare vicerectore. Audivit rhetoricam per triennium, sed impeditus est fere 9 menses. Modo docet grammaticam et concionatur in S. Bernardino. Non deest illi etiam gratia gubernandi. Loquitur latine, germanice et boemice. Est catechista inferiorum classium.

13. Antonius Stephanczich sclavus ex Costel, dioecesis labacensis, 26 annorum, patre Paulo Stephanczich, matre nescit, venit ad Societatem circa festum S. Marci [25 apr.] 67. Fuit confirmatus ab archiepiscopo, et accepit tonsuram et minores Pragae anno 67. Fecit vota primum anno 69 et nescit quando. Olomucii factus est scholasticus approbatus a rectore in Circuncisione Domini [6 ian.] anno 71 in renovatione votorum. Est magister infimae classis. Audivit per medium annum humanitatem. Loquitur latine, germanice et boemice. Est cellarius. [155v]

14. Martinus Undo hungarus ex Saza, episcopatus agriensis, patre Gregorio Undo, matre Barbara, 27 annorum, venit ad Societatem Viennae anno 67 in festo apostolorum Philippi et Iacobi [1 maii] et sequenti anno confirmatus est Pragae, et accepit tonsuram et 4 minores ab archiepiscopo in 4 temporibus Pentecostes. Fecit vota primum ibidem post 15 fere menses quam venit. Factus est scholasticus approbatus a P. Provinciali 1a dominica septembris [4 sept.] in renovatione votorum anno 69. Modo est in seminario. Audivit unum annum rhetoricam et humanitatem 15 menses, et legit per annum sintaxim. Loquitur latine, hungarice, aliquid boemice. Scit etiam aliquid graece.

15. Blasius [Hercegszöllösi] hungarus ex Hercegceless, oppido quod possident turcae, patre Georgio, matre Catharina, 28 annorum, episcopatus cuius sit, ignorat, venit ad Societatem Viennae 4 novembris anno 66. Fecit vota primum Pragae in die apostolorum Petri et Pauli [29 iun.] anno 67. Cepit tonsuram et 4 minores Pragae ab archiepiscopo anno 67 cum Luca [Perger] et aliis. De confirmatione est dubium, quia non meminit se confirmatum. Audivit et audit rhetoricam iam amplius triennio; humanitatem anno cum dimidio. Intelligit graece ut possit docere. Novit etiam parum legere hebraice. Loquitur tantum latine et hungarice.

16. Hieronymus Giolitus italus mediolanensis, 22 annorum, patre Ioanne Baptista, matre Francisca, venit ad Societatem primo die iunii 68 Viennae, et fecit vota primum Pragae in die Paschae [10 apr.] anno 69. Mediolani fuit confirmatus, Pragae vero accepit tonsuram et 4 minores simul ab archiepiscopo circa festum S. Bartholomei [24 aug.] anno 68. Olomucii factus est scholasticus approbatus in missa P. Rectoris anno 71 die Paschae [15 apr.]. Est studiosus rhetoricae quam audivit in Pascha per duos annos. Docuit graecam grammaticam per annum et componit graece carmine et soluta oratione sicut et latine. Loquitur latine, italice et hispanice, et est excitator fratrum. Habebit gratiam legendi et etiam concionandi in sua lingua.

17. Simon Nigromontanus [Czernovski] boemus pragensis, 22 annorum, patre Mathia Nigromontano et Martha, venit ad Societatem Pragae in die S. Procopii [156r] (festum est in aestate [4 iul.]) anno 68. Fecit vota primum in Penthecoste [29 maii] anno 69. Confirmatus est ab archiepiscopo ante ingressum in Societatem; in Societate vero vigilia Pentecostes anno 69. Accepit primam tonsuram et 4 minores ab archiepiscopo Pragae. Factus est scholasticus approbatus a P. Provinciali die 5a augusti in renovatione votorum. Audivit hic humanitatem anno cum dimidio. Modo rhetoricam audit a S. Luca [18 oct.] proximo 73. Est mediocriter fortis naturae. Habet gratiam concionandi et concionatur cum necessitas postulet. Loquitur solum latine et boemice. Graece nescit quia non habet visum ad eas litteras commodum.

18. Paulus Pistor boemus ex Saza dioecesis pragensis, annorum 22, patre Georgio Pistore, matre Dorothea, venit ad Societatem Pragae 29 maii anno 70. Fecit vota primum eodem anno in Nativitate Domini; eodem etiam confirmatus est et accepit tonsuram et quatuor minores ab archiepiscopo in vigilia Sancti Mathei [21 sept.]. Factus est scholasticus approbatus, approbatus a P. Provinciali in renovatione votorum in Nativitate B. Virginis [8 sept.] anno 72. Custodit libros chori et visitat cum itur cubitum, cubicula. Audivit hic humanitatem unum annum, rhetoricam audit simul cum Simone [Nigromontanus] graecam ac dialecticam lectiones. Est bonae spei ingenii tam ad docendum quam ad concionandum, et fortis.

19. Martinus Bast prutenus ex Frauenburga dioecesis varmiensis, 23 annorum, patre Bernardo Bast, matre Elizabetha, venit ad Societatem Viennae anno 69 circa diem sancti Marci. Fuit adhuc parvus domi confirmatus a cardinale Hosio. Fecit vota primum in Assumptione Beatae Mariae Virginis [15 aug.] eodem 69 anno, et Pragae eodem etiam accepit ab archiepiscopo tonsuram et quatuor minores in quatuor temporibus septembris. Factus est scholasticus approbatus Olomucii in [156v] renovatione votorum 5a augusti anno 71. Audivit humanitatem annum et medium. Iam est auditor rhetoricae, graecae et dialecticae erunt in Pascha duo anni. Facit bona carmina et orationes. Habet etiam gratiam docendi et concionandi, et est modestus, quietus et obediens. Modo laborat quartana. Loquitur germanice et latine.

20. Ioannes Hannius boemus pragensis, 21 annorum, patre Mathia cervisiario, matre Anna, venit ad Societatem Pragae in die sancti Alexii [17 iul.] anno 70, et paulo post confirmatus est ab archiepiscopo. Nescit an acceperit omnes quatuor minores. Fecit vota primum in Ascensione Domini [15 maii] anno 72, et eodem factus est scholasticus approbatus a P. Provinciali in renovatione votorum in Nativitate Beatae Virginis [8 sept.]. Hic est a renovatione proxima in festo sancti Lucae [18 oct.] facta et audit rhetoricam, graecam et dialecticam lectiones.

21. Ioannes Engelhardus Schiltz saxo ex Velingeshausen, pago prope Gotingam et putatur dioecesis halberstadiensis, patre Henrico Schiltz, matre Catharina, venit ad Societatem Olomucii anno 68 in Nativitate Beatae Virginis [8 sept.]. Fecit vota primum tertia dominica septembris [19 sept.]. Sequenti anno confirmatus est Pragae ab archiepiscopo et accepit quatuor minores ab eodem in 4 temporibus Quadragesimae anno 71, et factus est scholasticus approbatus ibidem eodem anno a magistro novitiorum ex commissione superioris in mense septembri. Hic est in seminario et audit rhetoricam, graeca et dialecticam ad Pascha per annum et medium. Non est firmae valetudinis. Dicitur posse aliquando bene concionari si per valetudinem licebit. Est modestus et boni iudicii. [157r]

22. Ioachimus Petronellus polonus ex Vialomasto, oppido Masoviae, dioecesis plocensis, annorum 27, patre Mathia Petronello, matre Anna, venit ad Societatem Pragae anno 67 in vigilia apostolorum Simonis et Iudae [28 oct.]. Vota primum fecit Pragae eodem anno, sed nescit diem. Extra Societatem fuit confirmatus Cracoviae. Pragae vero anno 69 circa Pentecostem accepit tonsuram et quatuor minores ab archiepiscopo. Audit humanitatem a 7 septembri proximo et est adiutor sacristani festis diebus.

23. Christophorus Mihil [Michel] tirolensis ex Raite, dioecesis brixiensis aut constantiensis, annorum 37, patre Mathia Mihil, matre Catharina, arte sartor, venit ad Societatem Viennae anno 61 in sancta hebdomada. Fecit vota primum anno 62. Nescit diem. Factus est coadiutor formatus a P. Provinciali Viennae in festo apostolorum Petri et Pauli [29 iun.] anno 69. Accepit confirmationem et tonsuram ab episcopo gurcensi et minores postea ab eodem anno 63. Est sacristanus et facit bene suum officium, sed est infirmus ex fractura, quamvis alias fortis naturae. Scit germanice et loquitur latine parum ex consuetudine.

24. Bartholomeus Andriolus italus ex Stafilo in Marchia, dioecesis ozimensis, 32 annorum, patre Iulio Andriolo, matre Condessa, arte sartor, venit ad Societatem Romae anno 63 die 27 februarii. Fecit vota ibidem primum 16 die maii eiusdem anni. Formatus coadiutor a P. Provinciali Viennae in die Omnium Sanctorum [1 nov.] anno 71. In patria fuit confirmatus ab episcopo suo. Tonsuram et 4 minores accepit Tirnaviae a scopiensi episcopo suffraganeo [157v] strigoniensi in aestate anno 65. Est infirmarius et peritus in ea re quia habet ad res medicas inclinationem, et est fortis. Scit parum legere et scribere.

25. Bartholomeus Molitor lusatius ex Vidgenauen dioecesis misnensis 32 annorum, patre Ioanne Hoyetko matre Walpurga, venit ad Societatem Pragae circa festum Sancti Iacobi [25 iul.] anno 61. Ibidem fecit vota primum in festo sanctae Catharinae [25 nov.] anno 62. Pragae confirmatus est, et accepit tonsuram et minores diverso tempore ab archiepiscopo. Propter capitis dolorem factus coadiutor temporalis. Modo ex necessitate iuvat in infima scholae classe. Est custos pannorum, non admodum fortis. Loquitur latine, germanice et boemice. Est quietus et bonus.

26. Ioannes Zenser sive Milner bavarus ex Mildorf, dioecesis saltzburgensis, annorum 25, patre Stephano Zenser matre Catharina. Fuit confirmatus Viennae ab episcopo modrusensi Sabbato Sancto [17 apr.] 68. Non habet tonsuram. Venit ad Societatem Olomucii anno 71 30 ianuarii. Fecit vota primum in die Conversionis sancti Pauli [25 ian.] 74. Scit legere parum et scribere, et loquitur germanice et ex consuetudine parum latine. Est simplex, bonus et fortis, credentiarius et ianitor. Nullam scit artem, nisi parum ligare libros.

27. Ioannes Schne bavarus ex Irpa, dioecesis estatensis, pistor arte, circa 30 annorum, patre Georgio Schne, matre Anna, venit ad Societatem Olomucii 30 ianuarii anno 71. Fuit hic confirmatus eodem anno circa Pentecosten ab episcopo olomucensi. Nescit legere nec scribere. Fecit vota primum in Conversione S. Pauli [25 ian.] anno 74. Est sanus, simplex et quietus. [158r] Loquitur germanice et aliquantum boemice. Pinsit et portat pannos ad lotricem et sordes extra collegium, findit legna et alia occurrentia.

28. Gaspar Aycay, hungarus de Bacon, episcopatus wesprimensis, 44 vel circiter annorum, patre Valentino Aycay, matre Dorothea, admissus est in Societatem 30 ianuarii anno 71 Olomucii pro coadiutore. Fecit vota primum in Conversione S. Pauli [25 ian.] anno 74. Fuit confirmatus Olomucii ab episcopo olomucensis in Pascha [26 mart.] anno 70. Est vir quietus. Loquitur hungarice, germanice, boemice et aliquantum latine. Est emptor et dispensator et praefectus culinae.